Netanjahú hafnar friðar­á­ætlun Trumps

Á ríkisstjórnarfundi í Ísrael í dag greindi Netanjahú frá því að Ísraelsmenn tækju ekki þátt í friðaráætluninni og hafni „fimmtán punkta skjalinu.“

Ísraelsher muni ekki draga sig í hlé fyrr en Hamas-samtökin hafi í raun og veru verið afvopnuð og hann muni halda áfram að bregðast við hótunum gegn borgurum sínum. 

Embættismaður Hamas-samtakanna sagði við breska ríkisútvarpið að samtökin stæðu við og ítrekuðu skuldbindingu sína við samkomulagið og þau myndu taka þátt í framkvæmd þess. Það væri þó háð því að Ísrael drægi herlið sitt frá Gasa og að öllum árásum yrði hætt. 

Stutt er í þingkosningar í Ísrael en Netanjahú hefur verið undir þrýstingi frá ríkisstjórn sinni að taka harðari afstöðu til aðgerða á Gasa, að sögn BBC. Því kom yfirlýsing forsætisráðherrans ekki á óvart.

Áætlun Trumps, sem hann kom á laggirnar í september síðastliðnum, um frið á Gasasvæðinu fól í sér stofnun friðarráðs til að hafa umsjón með framkvæmd friðarsamkomulags. Auk þess hafi friðarráðið ætlað að tryggja afvopnun Hamas-samtakanna, brottflutning ísraelskra hermanna og enduruppbyggingu Gasa. 

Ísraelsher hefur haldið árásum sínum á Gasa áfram þrátt fyrir að vopnahléssamkomulag sem tók gildi í október síðastliðnum. Samkvæmt Sameinuðu þjóðunum hafa um 1,9 milljónir manna, eða 90% íbúa Gasa, verið á flótta á svæðinu síðan stríðið hófst.

Sjá einnig: Níu ára stúlka meðal þeirra sem fórust og á­rásir enn nær dag­legt brauð