Blóð­bað í Köben: „Þetta var hel­vítis bras“

Kolbeinn Kristinsson hélt ferilskrá sinni sem atvinnuboxari flekklausri þegar hann vann Tékkann Pavel Sour með tæknilegu rothöggi á einkar blóðugu boxkvöldi í Kaupmannahöfn. Blóðmagnið á sér vart hliðstæðu.

„Þetta var helvítis bras,“ segir Kolbeinn og hlær.

„Heldur betur blóðbað. Ég var einmitt að pæla í því í gær hvort það sé ekki slæmt að missa svona mikið blóð. Þetta var örugglega lítri.“

Kolbeinn var heldur ófrýnilegur að sjá og bar sólgleraugu í viðtalinu til að hylja tvö myndarleg glóðaraugu. Hann segir líðanina betra en útlitið.

„Mér líður bara vel. Maður einhvern veginn er bara búinn að berjast og svo heldur lífið áfram,“ segir Kolbeinn.

Kolbeinn tognaði í kálfa tveimur dögum fyrir bardagann. Hann fór heldur hægt af stað í bardaga laugardagsins. Var meiðslunum um að kenna?

„Það ruglaði aðeins í manni, fótavinnan var ekki alveg sú sama. En það var þessi skalli sem sló mig aðeins út af laginu. Ég fékk þetta högg upp úr engu einhvern veginn. Það ruglaði mann smá og svo bara blæddi ótrúlega mikið,“ segir Kolbeinn og bætir við:

„Það fór í augun á mér og eitthvað. Ég sagði lækninum að það væri ekki að gerast en maður segir ekki alltaf satt.“

Iðulega hefur Kolbeinn unnið sína bardaga nokkuð þægilega og ekki fengið aðra eins áskorun eða blóðbað. Var þetta ekki öðruvísi áskorun?

„Þetta var það heldur betur. Þetta er skemmtileg lífsreynsla að eiga í bankanum og við tökum þetta með okkur í reynslubankann áfram.“

Hvað tekur nú við?

„Aðeins að recovera og fara yfir það sem fór úrskeiðis. Það er bara að bæta það og svo í haust tökum við eitthvað stórt.“

Viðtalið má sjá í spilaranum. Varað er við myndefninu sem fylgir fréttinni.