Innlent

Fleiri vilja sjá Sönnu sem borgar­stjóra en Björgu

Freyja Þórisdóttir og Kolbeinn Tumi Daðason skrifa
Sanna Magdalena Mörtudóttir oddviti Vinstrisins og Björg Magnúsdóttir oddviti Viðreisnar hafa báðar mætt í skemmtiþáttinn Af vængjum fram þar sem frambjóðendur til borgarstjórnar hafa undanfarið verið gestir Odds Ævars Gunarssonar.
Sanna Magdalena Mörtudóttir oddviti Vinstrisins og Björg Magnúsdóttir oddviti Viðreisnar hafa báðar mætt í skemmtiþáttinn Af vængjum fram þar sem frambjóðendur til borgarstjórnar hafa undanfarið verið gestir Odds Ævars Gunarssonar. Vísir/Anton Brink/Einar

Töluvert fleiri vilja sjá Sönnu Magdalenu Mörtudóttur oddvita Vinstrisins sem borgarstjóra en Björgu Magnúsdóttur oddvita Viðreisnar samkvæmt nýrri könnun Maskínu um hug borgarbúa til þess hver oddvitanna eigi að verða borgarstjóri.

Könnunin er í samræmi við könnun Maskínu sem birt var í gær um fylgi flokkanna í tilfelli Hildar Björnsdóttur og Péturs Marteinssonar. Flestir vilja sjá Hildi, oddvita Sjálfstæðisflokksins, sem borgarstjóra eða rúm 28 prósent en 19 prósent nefna Pétur oddvita Samfylkingarinnar.

Tæplega 30 prósent vlija Hildi Björnsdóttur sem borgarstjóra og munar töluvert miklu á henni og Pétri Marteinssyni í þeim efnum sem er í öðru sæti.

Þar skammt á eftir kemur Sanna Magdalena Mörtudóttir hjá Vinstrinu, tæp 18 prósent nefna hana, og svo Björg Magnúsdóttir hjá Viðreisn með 10 prósent. Athygli vekur að fylgi Sönnu er töluvert umfram fylgi Vinstrisins á meðan fylgi Bjargar er undir fylgi Viðreisnar.

Svarendur könnunarinnar eru átján ára og eldri með búsetu í Reykjavík en hópurinn var dreginn með tilviljun úr Þjóðskrá. Könnunin fór fram dagana 29. apríl til 6. maí og voru svarendur ríflega níu hundruð og tuttugu.

Einar Þorsteinsson hjá Framsóknarflokki mælist með 8,5 prósent sem er nær tvöfalt fylgi flokksins í borginni á meðan fylgi Ara Edwald er á pari við fylgi Miðflokksins hvar hann er oddviti.

Fimm prósent nefna Silju Sóleyju Birgisdóttur hjá Sósíalistum sem borgarstjóraefni, tvö prósent Kristin Jón Ólafsson Pírata og eitt prósent Sigfús Aðalsteinsson hjá Okkar borg. Guðmundur Ingi Þóroddsson hjá Flokki fólksins og Ingimar Þór Friðriksson hjá Góðan daginn mælast með undir eitt prósent fylgi sem borgarstjóraefni.

Sveitarstjórnarkosningar 2026 Reykjavík Skoðanakannanir Borgarstjórn Sósíalistaflokkurinn Viðreisn

Mest lesið


Fleiri fréttir

Sjá meira


×

Mest lesið