„Það er ekkert grín að mæta í Kapla­krika“

FH er með bakið upp við vegg fyrir leik kvöldsins. Valur er 2-1 yfir í einvíginu og með sigri í Kaplakrika í kvöld verður liðið Íslandsmeistari í 25. sinn. En Jón Bjarni og félagar í FH hafa engan áhuga á að láta það gerast.

„Leikurinn leggst bara mjög vel í mig. Við ætlum að mæta hundrað prósent, gefa alvöru slag og enda á sigri,“ sagði Jón Bjarni í samtali við íþróttadeild í dag.

Allir þrír leikirnir í úrslitaeinvíginu hafa unnist á heimavelli og Jón Bjarni vonast til að engin breyting verði þar á í kvöld.

„Það verður svo sannarlega raunin í kvöld. Það er ekkert grín að mæta í Kaplakrika, hvað þá þegar það er að duga eða drepast,“ sagði Jón Bjarni.

„Þetta eru búnir að vera jafnir leikir. Augljóslega geta bæði lið unnið hvort annað. Sérstaklega leikur þrjú, hann hefði getað sveiflast í báðar áttir. Við hefðum átt að gera betur þar en við bætum upp fyrir það í dag.“

Frábært tímabil

Jón Bjarni kveðst ánægður með tímabilið hjá FH en vonast að sjálfsögðu til að það endi með öðrum Íslandsmeistaratitlinum á síðustu þremur árum.

„Mér finnst þetta í raun vera frábært tímabil. Við erum einu stigi frá því að vera deildarmeistarar. Svo gerum við smá mistök á móti Haukum í bikarnum og dettum út þar í undanúrslitum. Og núna erum við komnir í leik fjögur í úrslitaeinvíginu við Val,“ sagði Jón Bjarni.

Stoltur af ungu strákunum og vonar að þeir hlusti

„Þetta er góður árangur, sérstaklega með ungu strákana sem eru búnir að koma svo rosalega vel inn. Maður er mjög stoltur af þeim og þeir eru ótrúlega góðir. Gassi [Garðar Ingi Sindrason] er að fara út til Gummersbach og Ómar [Darri Sigurgeirsson] er búinn að stíga heldur betur upp. Svo allir hinir strákarnir. Við erum allir duglegir að æfa og allir að róa í sömu átt.“

Þótt Jón Bjarni sé ekki aldraður er hann meðal elstu manna í leikmannahópi FH. Hann reynir eins og hann getur að hjálpa ungu strákunum í liðinu.

„Já, maður reynir að miðla einhverri reynslu en hvort þeir séu tilbúnir til að hlusta á mann, það verður að koma í ljós,“ sagði Jón Bjarni.

Leikur FH og Vals hefst klukkan 19:30 í kvöld og verður í beinni textalýsingu á Vísi.