Nær­föt og nátt­föt rjúka út í nýrri vef­verslun Lindex

„Já heldur betur, það hrannast inn pantanirnar og byrjaði áður en við fórum að auglýsa síðuna,“ segir Tinna Sigrún Pétursdóttir, markaðsstjóri S4S en opnun netverslunarinnar er fyrsta skrefið í uppbyggingu Lindex á Íslandi undir stjórn S4S.

Tinna segir það greinilegt að fólk var orðið spennt og farið að bíða eftir að netverslunin opnaði á ný með ferskum og nýjum vörum. Undirbúningur fyrir þrjú ný verslunarrými í Kringlunni, Smáralind og á Glerártorgi á Akureyri stendur nú yfir sem stefnt er á að verði opnuð með vorinu.

„Við vorum afar spennt að opna Lindex.is og hefja þannig nýjan kafla Lindex á Íslandi. Lindex vörumerkið hefur verið áberandi hér á landi og hefur verið frá byrjun eitt vinsælasta vörumerkið í mörgum vöruflokkum, sérstaklega barnafötum, undirfötum og náttfötum. Fólk fékk smá panikk um tíma, sérstaklega varðandi nærfötin, enda eru það vörurnar sem við sjáum að fara fyrst í vefversluninni,“ segir Tinna.

Nýjar vörur koma nú vikulega inn og segir Tinna áherslu lagða á hraðan afhendingartíma.

„Á Lindex.is bjóðum við upp á hraða og örugga þjónustu þar sem hægt er að fá pantanir afhendar samdægurs á höfuðborgarsvæðinu og innan tveggja daga á landsbyggðinni. Áhugasamir viðskiptavinir geta líka skráð sig í Lindex klúbbinn þar sem hægt verður að fylgjast með nýjustu fréttum og upplýsingum um tilboð og nýjar vörur,” segir Tinna. „Viðskiptavinir geta líka fundið allar Lindex vörur á Skór.is þar sem þú færð allt vöruúrval S4S þar inni.

S4S mun halda viðskiptavinum vel upplýstum um gang mála varðandi opnanir á nýjum Lindex verslunum í vor.