Sögðust vera kepp­endur frá landi sem er ekki til

Federico Corsetti og Giancarlo Folonari eru nítján ára gamlir vinir sem störfuðu sem sjálfboðaliðar á leikunum. Með lævísni tókst þeim að lauma sér inn á alls konar staði sem þeir höfðu ekki aðgang að.

Félagarnir létu útbúa fatnað, borða og nælur með gulum fána þykjustulandsins Mandostan. Þannig komust þeir inn á lokaðar samkomur, þar sem þeir hittu raunverulega keppendur en einnig frægðarfólk eins og Jurgen Klopp og Boris Becker.

Þeir stofnuðu líka opinberan Instagram reikning fyrir Ólympíulið Mandostan þar sem þeir birtu myndir af sér úr lokuðum samkomum. 

„Frændi minn gerði það sama í Tórínó árið 2006 og okkur dreymdi að gera þetta. Við ólumst upp við þessa sögu og vildum leika hana eftir,“ sagði Federico við sænska miðilinn Expressen.

„Þetta var súrrealískt. Að standa og tala við Jurgen Klopp, sem sagðist aldrei hafa hitt neinn frá Mandostan. Hann trúði því að við hefðum verið að keppa á skíðum fyrr um daginn,“ bætti Federico við.

Handteknir og yfirheyrðir sem hryðjuverkamenn 

Á endanum voru þeir þó gómaðir og handteknir. Fólk sem var vel að sér í landafræði kannaðist ekki við fánann og hélt að þeir væru fulltrúar hryðjuverkasamtaka.

„Það var ekki jafn gaman. Við þurftum að sitja í yfirheyrslum og eitthvað svoleiðis. Við vorum reknir út úr partýinu og okkur var bannað að starfa sem sjálfboðaliðar eftir það.“

Þeir segja þetta þó ekki eingöngu til gamans gert. Heldur hafi þeir verið að senda táknræn skilaboð.

„Það eru svo margar örþjóðir í heiminum sem fá ekki að keppa á Ólympíuleikum. Mandostan er fulltrúi þeirra, jafnvel þó það sé ekki til.“