Viti ekki hvað er í samningi NATO sem semji ekki fyrir hönd Græn­lands

„Ég veit ekki hvað stendur í þessum samningi. En ég hlakka til að vinna að honum í vinnuhópnum,“ sagði Jens-Frederik Nielsen, formaður landsstjórnarinnar, á blaðamannafundi nú síðdegis um viðræður Trumps og Mark Rutte, framkvæmdastjóra NATO. Grænlenski ríkismiðillinn KNR greinir frá.

Nielsen segir jafnframt að Grænlendingar séu til í að sjá aukna hernaðarviðveru á svæðinu og þar með talið varanlega NATO-sveit.

„Við viljum efla öryggi á norðurslóðum með mikilvægum aðgerðum, þar á meðal varanlegri NATO-sveit á Grænlandi og aukinni hernaðarviðveru og æfingum.“

Svaraði litlu um Gullhvelfinguna

Fréttamaður bandarísku sjónvarpsstöðvarinnar Fox News var einnig viðstaddur blaðamannafundinn og spurði formann landsstjórnarinnar um skoðun hans á hugmyndum um víðtækt loftvarnarkerfi sem Trump-stjórnin hefur kallað Gullhvelfinguna. Trump nefndi í gær að minnst sé á slíka uppbyggingu í rammasamkomulagi forsetans og NATO.

„Ég vil segja að við hlökkum nú til að sjá frekari niðurstöður starfshópsins sem vinnur að lausn fyrir báða aðila,“ svaraði Nielsen.

Eftir fund með framkvæmdastjóra NATO í gær hætti Trump við að leggja refsitolla á innflutning frá hópi Evrópuríkja sem staðið hafa með Grænlandi.

Lítið hefur fengist uppgefið um efni viðræðna Trumps og Rutte á sama tíma og dönsk yfirvöld hafa gefið út að NATO semji ekki fyrir þeirra hönd. 

Sjá einnig:  Rutte samdi ekki við Trump fyrir hönd danska konungsríkisins

Vivian Motzfeldt, utanríkisráðherra grænlensku landsstjórnarinnar, tjáði sig um fregnirnar í dag og talar á svipuðum nótum og dönsk yfirvöld.

„Ég vil leggja áherslu á að NATO hefur ekki samið fyrir hönd Grænlands. Enginn formlegur samningur hefur verið undirritaður um Grænland án þátttöku Grænlands. Danska stjórnin átti heldur enga fulltrúa á fundinum,“ segir hún í fréttatilkynningu.

Fréttin hefur verið uppfærð.