Helenu nóg boðið: „Ætlum við í al­vöru að leyfa þessu að gerast?“

Davíð Tómas Tómasson, alþjóðadómari í körfubolta, opnaði umræðuna með ítarlegu viðtali við Vísi í vikunni þar sem hann útskýrði hvers vegna hann hefði nú lagt dómaraflautuna á hilluna þrátt fyrir ungan aldur.

Davíð segir samskiptaörðugleika við dómaranefnd KKÍ hafa valdið því að hann hætti að fá leiki til að dæma en það hafi gerst í kjölfar þess að hann skipulagði námskeið fyrir dómara, án þess að hafa KKÍ eða dómaranefnd með í ráðum. Því hafi ekki verið vel tekið.

Davíð sagði fleiri dómara hafa hrökklast úr starfi vegna samskipta við dómaranefnd KKÍ og það staðfesti Jón Guðmundsson í viðtali við Vísi á þriðjudag. Jón kvaðst sjálfur hafa neyðst til að hætta vegna ósættis við dómaranefnd KKÍ.

Jón Bender er formaður dómaranefndar KKÍ en hann hefur hingað til ekkert viljað tjá sig um þessi mál. Í samtali við Vísi í gær bar hann því við að um starfsmannamál væri að ræða og að hann hygðist ekki ræða þau opinberlega.

Svipaða sögu er að segja af skrifstofu KKÍ þar sem framkvæmdastjórinn Hannes S. Jónsson hefur ekki viljað tjá sig um málið hingað til.

Mikillar óánægju hefur gætt í körfuboltasamfélaginu vegna alls þessa enda góðir dómarar ekki á hverju strái.

Á meðal þeirra sem furða sig á stöðunni er ein fremsta körfuboltakona Íslands frá upphafi, og mögulega sú fremsta, Helena Sverrisdóttir.

„Hvaða rugl er í gangi?“ spyr Helena á Facebook-síðu sinni þar sem hún vísar í frétt Vísis um að formaður dómaranefndar ætli ekkert að tjá sig.

„Geri mér fulla grein fyrir því að það séu tvær hliðar á öllum málum - en ætlum við í alvöru að leyfa þessu að gerast? Einn besti dómarinn okkar (ekki eru þeir nú fjölmennir) og honum bolað út fyrir að vilja að gera dómarana betri?! Ég skil þetta ekki alveg og finnst skrýtið að þeir ætli ekkert að reyna að útskýra sín mál,“ sagði Helena og fær góðar undirtektir.