Fagnar eins og Gyökeres og bjó til skýringu

BBC fjallaði um Eseme fyrir mótið en athyglin sem því fylgdi virðist ekki hafa hjálpað því hann hafnaði í 34. sæti í 100 metra hlaupinu í dag, á 10,24 sekúndum, og komst ekki áfram í undanúrslit.

Eseme keppir fyrir Kamerún á HM en á öðrum mótum keppir hann fyrir Sporting Lissabon sem er nefnilega ekki bara fótbolta- og handboltalið heldur keppir einnig í fleiri greinum.

Hann fagnar meira að segja eins og markahrókurinn Viktor Gyökeres, sem raðaði inn mörkum fyrir Sporting áður en hann var seldur til Arsenal, með því að flétta saman höndum og leggja þær yfir munninn sinn.

„Ég var hrifinn af því hvernig hann spilaði. Hann var sterkur og mjög ákveðinn,“ sagði Eseme við BBC.

„Ég vissi ekki hvað gríman sem hann gerir táknaði en svo ákvað ég að gefa henni merkingu. Þetta er eins og sjóræningjagríma. Og þegar sjóræningjar fara eitthvert þá breyta þeir öllu þar og ég trúi því að ég sé að gera það sama í frjálsum íþróttum. Ég fer sem sjóræningi, þessi sem breytir hlutunum,“ sagði Eseme.

Hann varð líka hæstánægður þegar Gyökeres sendi honum myndbandsskilaboð og óskaði honum til hamingju með að hafa komist inn á Ólympíuleikana í París í fyrra.

„Það hvatti mig bara enn frekar áfram. Að vera verðugur þess að bera grímuna.“

Eftir 100 metra hlaupið í dag á Eseme svo eftir að keppa einnig í 200 metra hlaupi á mótinu í Tókýó.