Körfubolti

Besta sætið um Tryggva: „Hafði aldrei heyrt um Eið Smára, Jón Arnór eða Óla Stef“

Ingvi Þór Sæmundsson skrifar
Tryggvi Snær Hlinason hefur verið einn besti leikmaður Evrópumótsins í körfubolta.
Tryggvi Snær Hlinason hefur verið einn besti leikmaður Evrópumótsins í körfubolta. vísir/hulda margrét

Stóru orðin voru ekki spöruð um stóra manninn úr Svartárkoti þegar leikur Íslands og Póllands á EM var gerður upp í Besta sætinu, hlaðvarpi íþróttadeildar Sýnar.

Ísland tapaði fyrir heimaliði Póllands í gær, 84-75. Mikið hefur verið rætt og ritað um frammistöðu dómara leiksins en frammistaða Tryggva fór heldur ekki fram hjá neinum, þó á ólíkt jákvæðari hátt.

Tryggvi skoraði 21 stig, tók tíu fráköst og varði þrjú skot í leiknum í gær. Hann hefur borið af í íslenska liðinu á EM og verið einn besti leikmaður mótsins. Aðeins fimm leikmenn eru með hærra framlag að meðaltali í leik á EM en Tryggvi og það engin smá nöfn heldur NBA-stjörnurnar Luka Doncic, Lauri Markkanen, Nikola Jokic, Giannis Antetokounmpo og Alperen Sengun.

„Hann er algjörlega frábær. Það kemur manni á óvart í hvert skipti sem maður sér hann hversu mikið hann bætir sig. Maður trúir því ekki hversu langt hann er kominn. Hann er að spila á móti alls konar körlum og hann er bara í heimsklassa. Hann er gjörsamlega magnaður,“ sagði Halldór Örn Halldórsson í Besta sætinu.

Benedikt Guðmundsson þekkir Tryggva vel enda þjálfaði hann miðherjann þegar hann lék með Þór á Akureyri.

Ennþá að verða betri

„Hann var búinn að æfa í einhverja 5-6 mánuði þegar ég kom þarna norður og tók við Þórsurunum. Þeir þarna fyrir norðan voru búnir að finna hann inni í Bárðardal og hann kom á snjósleða á æfingar og svona. Það var eiginlega alltaf ófært,“ sagði Benedikt.

„Tryggvi er bara búinn að vera afburða góður. Hann er svo mikilvægur. Eins og ég hef alltaf sagt: Hann er búinn að breyta landslaginu hjá karlalandsliðinu eftir að hann kom inn og hann er ennþá að verða betri. Hann byrjaði seint svo það er enn svigrúm til bætinga og hann verður enn að bæta sig 35 ára.“

Gæti farið í EuroLeague

Stefán Árni Pálsson spurði Benedikt hversu langt hann teldi að Tryggvi gæti náð.

„Ég er kannski ekki að sjá EuroLeague-lið í næsta stökki en það hlýtur að vera endatakmarkið. Til að taka skrefið í EuroLeague þarf hann hugsanlega betri vítanýtingu. Hann þarf kannski að geta skotið aðeins af millifærinu en eftir svona 3-4 ár get ég séð hann í EuroLeague,“ sagði Benedikt.

Hann segir að Tryggvi eigi gott með að tileinka sér nýja hluti.

„Framfarirnar sem maður sá hjá honum svona snemma á ferlinum, hvað hann er ofboðslega fljótur að læra, er ekkert sem allir hafa. Fyrstu árin var samhæfing líkamans og allt það að trufla hann en þetta vinnueðli; hann var stundum að sækja mig korter í sjö á morgnana og við vorum að fara upp í höll á Akureyri ásamt Júlíusi Orra [Ágústssyni] og einhverjum krökkum. Hann var bara að æfa með 5-10 árum yngri krökkum í grunnæfingum og fannst ekkert að því,“ sagði Benedikt.

„Hugarfarið, vinnusemin og þessi eiginleiki að geta lært hluti og meðtekið þá og skilið þá. Hann vissi hvað íþróttir voru fyrir nokkrum árum. Hann hafði aldrei heyrt um Eið Smára, Jón Arnór eða Óla Stef. Það voru engar íþróttir í sjónvarpinu heima hjá honum í Dalnum. En svo er hann með meðfædda tilfinningu fyrir leiknum, þar sem hann skilur leikinn, sem hann vissi ekki einu sinni sjálfur að hann hefði.“

Tryggvi, sem er 27 ára, leikur með Bilbao Basket á Spáni. Hann vann Europe Cup með liðinu á síðasta tímabili.

Í fyrstu þremur leikjunum á EM er Tryggvi með 18,0 stig, 11,3 fráköst, 1,3 stoðsendingar, 1,0 stolinn bolta og 2,7 varin skot að meðaltali.

Fjórði leikur Íslands á EM er gegn Slóveníu á morgun. Leikurinn hefst klukkan 15:00.

Hægt er að hlusta á Besta sætið í heild á tal.is eða í öðrum hlaðvarpsveitum, eða í spilaranum hér ofar í greininni.


Tengdar fréttir

„Eins og að dómararnir hefðu veðjað á þennan leik“

„Það er alltaf ömurlegt þegar leikir ráðast á einhverju svona bulli,“ sagði körfuboltaþjálfarinn Benedikt Guðmundsson þegar dómararnir fengu að finna fyrir því í umræðum eftir tap Íslands gegn Póllandi á EM í körfubolta í gær.

Skýrsla Henrys: Rændir í gini ljónsins

Það er oftast hallærislegt að kenna dómurum um er þú tapar íþróttaleik en það er ekki annað hægt en að setja dómaratríóið í leik Íslands og Póllands undir smásjána.

„Hjartað rifið úr okkur“

Craig Pedersen, þjálfari íslenska landsliðsins, var ómyrkur í máli eftir leik og vandaði dómurum leiksins ekki kveðjunnar.

„Fannst tækifærið vera tekið af okkur“

Elvar Már Friðriksson var vonsvikinn í leikslok eftir svekkjandi tap gegn Póllandi í kvöld en að sama skapi stoltur af sínum mönnum. Hann er sannfærður um að Ísland hafi átt meira á tanknum en Pólland, en þar sem leikurinn kláraðist á vítalínunni fékk Ísland ekki tækifæri til að sýna það í verki.

„Þetta er bara gullfallegt“

Tryggvi Snær Hlinason, miðherji íslenska karlalandsliðsins í körfubolta, var eðlilega súr og svekktur eftir tap liðsins gegn Pólverjum á Evrópumótinu í kvöld.

„Vont er þeirra ranglæti. Verra er þeirra réttlæti“

Ólafur Stefánsson, einn besti handboltamaður Íslands frá upphafi, hvetur hvern einasta íþróttamann hér á landi til að nota frammistöðu íslenska karlalandsliðsins í körfubolta sem innblástur til að leggja meira á sig.

„Bíður í átta ár eftir svona móti og þetta eru vinnubrögðin“

Landsliðsfyrirliðinn, Ægir Þór Steinarsson, var eðlilega súr í leikslok þegar náð var á hann á viðtalssvæðinu í Katowice. Ísland var aftur grátlega nálægt því að sækja sigur en fengu ekki tækifæri til þess sökum nokkurra vafasamra dóma í lok leiksins gegn Póllandi sem tapaðist 84-75.




Fleiri fréttir

Sjá meira


×