Þúsundir Norð­manna fengu fyrir mis­tök til­kynningu um að hafa unnið milljónir

Þúsundir fengu þannig tilkynningu í app hjá sér á föstudag að þau hefðu unnið upphæð í Eurojackpot sem hefði breytt lífi flestra. Í frétt NRK um málið segir að vegna mannlegra mistaka hafi upphæðin sem fólkið vann verið um tíu þúsund sinnum hærri en hún raunverulega var.

Alls unnu 41.147 Norðmenn í Eurojackpot og voru um 16 þúsund þeirra með appið stillt þannig að þau áttu að fá tilkynningu í símann ef þau unnu. Í frétt Guardian segir að Norsk tipping fái verðlaunaupphæðirnar frá Þýskalandi í evrum og að þeim sé svo breytt í norskar krónur. Við þessa breytingu hafi verið gerð mistök og upphæðin hafi verið mörgfölduð með 100 í stað þess að deila með 100.

Þessar upphæðir voru bæði sendar í appið og settar á vefsíðu Norsk tipping á föstudag en svo fjarlægðar síðar. Norsk tipping hefur staðfest að enginn fékk þessar upphæðir greiddar.

Málið hefur vakið mikla umræðu í Noregi um fjárhættuspil og regluverkið í kringum það. Ráðherra menningarmála hefur gagnrýnt málið fundaði með fyrirtækinu í gær.

Skemmtileg mínúta

Á vef NRK er að finna viðtöl við fólk sem hélt að það hefði unnið milljónir norskra króna og að einhverjir hafi verið byrjaðir að fagna áður en þeim varð ljóst að um mistök hafi verið að ræða. Eitt par hafi ætlað að nota peninginn til að ljúka endurgerð á eldhúsinu á meðan aðrir töluðu um að hafa ætlað að kaupa sér bíl eða fara í frí.

„Þetta var skemmtileg mínúta,“ er haft eftir Lise Naustdal sem hélt að hún hefði unnið 1,9 milljón norskra króna. Það samsvarar um 22 milljónum íslenskra króna.

Í frétt NRK um afsögn Sagstuen segir að þetta sé ekki í fyrsta sinn sem Norsk tipping lendir í vandræðum vegna mistaka. Félagið fékk sekt upp á 26 milljónir í mars og 46 milljóna sekt í apríl.