Njarð­víkingar með mont­réttinn í Reykja­nes­bæ og topp­sæti deildarinnar

Njarðvíkingar hafa tuttugu stig eftir tíu leiki og eru með einu stigi meira en ÍR sem á þó leik inni.

Njarðvíkurliðið er enn taplaust í deildinni í sumar, með fimm sigra og fimm jafntefli.

Það reyndi þó á Njarðvíkinga í kvöld því Keflvíkingar komust yfir í leiknum á 61. mínútu með marki Kára Sigfússonar.

Keflavíkurliðið var yfir í sextán mínútur en þá sneru heimamenn leiknum við með tveimur mörkum á tveimur mínútum.

Það fyrra skoraði varamaðurinn Björn Aron Björnsson á 77. mínútu og á 79. mínútu bætti Oumar Diouck öðru marki við.

Njarðvíkingar voru ekki hættir og Dominik Radic innsiglaði sigurinn með þriðja markinu á 90. mínútu. Markið skoraði hann úr víti.

Keflvíkingar hefðu heldur betur þurft á sigri að halda til að koma sér inn í baráttuna um Bestu deildar sæti enda aðeins búnir að vinna þrjá af níu deildarleikjum sínum í sumar. Liðið er í sjöunda sæti með tólf stig en aðeins liðin í öðru til fimmta sætið komast í úrslitakeppnina.

Síðasti sigurleikur Keflavíkur kom 23. maí eða fyrir meira en mánuði síðan. Þetta var fimmti deildarleikur liðsins í röð án sigurs en þrír af þeim hafa endað með jafntefli.