City stað­festir kaupin á Reijnders

Reijnders var kynntur á samfélagsmiðlum City en kaupin gengu í gegn fyrir lokun félagaskiptagluggans í gær. Reijnders kvaðst spenntur fyrir því að vinna titla með liði sem spilar sóknarbolta sem hentar honum vel.

Reijnders hefur verið hjá AC Milan undanfarin tvö tímabil og var valinn besti miðjumaður ítölsku úrvalsdeildinnar á nýliðnu tímabili þar sem hann skoraði 15 mörk í 54 leikjum í öllum keppnum.

Hollendingurinn er fjórði maðurinn sem City festir kaup á fyrir HM félagsliða, alls fyrir rúmlega hundrað milljónir punda, á eftir franska sóknarmanninum Rayan Cherki, alsírska bakverðinum Rayan Ait-Nouri og enska markverðinum Marcus Bettinelli.

Allir verða löglegir á HM félagsliða, þar sem liðið mun leika undir stjórn Pep Guardiola með nýjum aðstoðarþjálfurum, Pep Lijnders og James French.