Selur í­búð með náttúru­para­dís í bak­garðinum

„Sæta íbúðin mín er komin á sölu. Þrátt fyrir að hafa aðeins búið þar sjálf í sex mánuði leið mér svo vel og mér þykir ótrúlega vænt um hana. Ég vona að hún fari í góðar hendur. Þetta er fullkomin fyrsta eign – með náttúruparadísina í Elliðaárdalnum í bakgarðinum,“ skrifaði Rakel og deildi fasteigninni á Instagram.

Stílhrein og björt

Um er að ræða 62,8 fermetra íbúð á annarri hæð í húsi sem byggt var árið 1974. Eignin hefur hlotið töluverðar endurbætur á undanförnum árum og er hin glæsilegasta.

Stofa, borðstofa og eldhús eru samliggjandi í opnu og björtu rými með ljósu harðparketi á gólfum. Útgengt er úr stofunni á yfirbyggðar svalir. Eldhúsið er prýtt stílhreinum hvítum innréttingum og ljósri viðarborðplötu.

Svefnherbergið er rúmgott með góðum fataskápum. Baðherbergið er flísalagt, með baðkari og snyrtilegri hvítri innréttingu.