„Norðan ó­veður á landinu í dag“

Veðurstofa Íslands spáir 13-23 m/s í dag og að hvassast verði í vindstrengjum sunnanlands. Draga fer þó úr vindi seint í dag.

Í athugasemd veðurfræðings segir að á landinu verði norðan óveður og síðan sé útlit fyrir talsverða úrkomu á Norðurlandi þar til á morgun.

Klukkan átta verða gular eða appelsínugular viðvaranir í gildi um allt land. Þær eru appelsínugular á norðausturhluta landsins og á Suðurlandi. Annars staðar verða gular viðvaranir.

Appelsínugulu viðvaranirnar falla úr gildi klukkan þrjú í dag en gular viðvaranir verða í gildi þar til á morgun, lengst á Norðurlandi. Almannavarnir hafa lýst yfir óvissustigi vegna veðursins.

Lögreglan á Vestfjörðum segir snjó, krap og hálku víða á fjallvegum á Vestfjörðum og sömuleiðis einnig á láglendi. Ökumenn eru beðnir um að fara varlega og vakta ástæður.

Veðurhorfur á landinu næstu daga.

Á miðvikudag:

Norðan 10-18 m/s, en 8-15 seinnipartinn. Rigning um landið norðanvert og hiti 2 til 7 stig, sums staðar talsverð úrkoma fram eftir degi. Þurrt að kalla sunnan heiða með hita 7 til 13 stig.

Á fimmtudag og föstudag:

Norðan og norðvestan 8-15 og rigning eða slydda með köflum, en þurrt að mestu sunnanlands. Hiti breytist lítið.

Á laugardag:

Norðlæg eða breytileg átt 3-10, skýjað með köflum og dálitlar skúrir eða slydduél á víð og dreif. Hiti 2 til 11 stig, mildast syðst.

Á sunnudag (hvítasunnudagur):

Suðvestlæg eða breytileg átt og víða dálitlar skúrir. Hlýnar lítillega.

Á mánudag (annar í hvítasunnu):

Austlæg átt og væta með köflum, en lengst af þurrt á Norðurlandi. Hiti 5 til 12 stig.