Gerði stólpa­grín að ríkisstjórnarflokkunum

Bjarni, sem stígur úr stóli formanns á sunnudaginn eftir tæplega sextán ára formannstíð, fór um víðan völl í ræðu sinni og uppskar reglulega hlátur þegar hann skaut á ríkisstjórnarsamstarf Samfylkingarinnar, Viðreisnar og Flokks fólksins.

Landsfundur Sjálfstæðisflokksins var settur klukkan 16:30 í dag með setningarræðu Bjarna Benediktssonar, formanns Sjálfstæðisflokksins, sem horfa má á í greininni hér að neðan:

Inga Sæland eða Don Corleone?

Hann óskaði ríkisstjórninni alls hins besta áður en hann sagði vandamál ríkisstjórnarinnar ekki snúa að krefjandi verkefnum heldur sé hún sjálf vandamálið.

„Inga hafði verið ráðherra í 13 klukkutíma og 18 mínútur þegar hún var byrjuð að ráðast á fjölmiðla og skamma þá fyrir að spyrja sig spurninga og nokkrum dögum síðar hringdi hún í skólastjóra úti í bæ og hótaði honum lögreglunni út af týndum strigaskóm. Sagan segir að Inga hafi minnt á Don Corleone úr Guðföðurnum þar sem hún sat heima með köttinn í annarri, símtólið í hinni og sagði skólastjóranum að hún væri vel tengd inn í lögregluna,“ sagði Bjarni.

Hann sagði að ruglið hefði þá bara verið rétt að byrja og tók fyrir fyrri andstöðu Eyjólfs Ármannssonar innviðaráðherra við innleiðingu bókunar 35 en hann hafði áður lýst því yfir að bókun 35 jafngilti stjórnarskrárbroti.

„Þessi viðskipti með stjórnarskrána eru auðvitað einsdæmi í íslenskri stjórnmálasögu. Óskiljanleg og stórfurðuleg!“ sagði Bjarni.

Finnur til með fjármálaráðherra

Hann lét sér ekki nægja að gera gys að ríkisstjórninni heldur gerði hann biðlaunagreiðslur, hinn svokallaða neyðarsjóð, Ragnars Þór Ingólfssonar fyrrverandi formanns VR einnig að umtalsefni sínu.

„Þetta og meira til á fyrstu vikum kjörtímabilsins - sannkallaðar hraðfréttir,“ sagði hann og sagði hug sinn allan hjá fjármálaráðherra á hans fyrstu dögum í embætti.

„Fyrsta verkefnið kemur í hús - Flokkur fólksins vill 48 daga strandveiðikerfi! Elsku maðurinn er nýbúinn að skrifa lærða grein um hversu þjóðhagslega óhagkvæmt það kerfi er og hvernig það brýtur gegn öllum hugmyndum um almannahag. Kerfið er samkvæmt grein ráðherrans “efnahagsleg sóun,““ sagði hann.

Plan Kristrúnar hljóti sömu örlög og nýja símaskráin

Bjarni sagði hið margumtalaða plan Samfylkingar Kristrúnar Frostadóttur munu hljóta sömu örlög og ný símaskrá.

„Þessi nöpru örlög Plansins birtust þjóðinni þegar þingmálaskrá ríkisstjórnarinnar leit dagsins ljós. Ekkert nýtt, ekkert sem skipti máli, ekkert plan.

Kannski vilja einhverjir skrifa þennan vandræðagang ríkisstjórnarinnar á reynsluleysi, en ég er ekki viss. Flokkur fólksins er bara svona. Samfó er bara svona. Og Viðreisn er bara svona. Fyrir kosningar hafði Samfylkingin slegið ESB-aðild af borðinu og Viðreisn komst í gegnum kosningabaráttuna meira og minna án þess að minnast á þetta helsta baráttumál sitt,“ sagði Bjarni.