Isavia fær tvo daga til að loka flug­brautinni

Í erindi Samgöngustofu kemur fram að ráðstöfunin gildi til 5. maí næstkomandi. Henni verði aflétt þegar staðfest hefur verið að aðflugsleiðin sé hindranafrí eða að Isavia hafi auðkennt mögulegar mildunarráðstafanir.

Í tilskipun Samgöngustofu frá því í gær segir:

„Mælingar Isavia innanlandsflugvalla frá október sl. staðfesta að trjágróður hefur vaxið upp í hindranafleti Reykjavíkurflugvallar og því er ekki hægt að tryggja hindranalaust aðflug og flugtak á flugbraut 13/31. Hvorki Isavia innanlandsflugvöllum né Samgöngustofu hefur tekist að fá hindranir fjarlægðar þrátt fyrir skýr ákvæði Skipulagsreglna Reykjavíkurflugvallar og hefur Reykjavíkurborg verið veittur frestur til 17. febrúar nk. til að upplýsa Samgöngustofu um hvernig staðið verður að uppfyllingu þeirra krafna.

Samgöngustofa beinir þeim fyrirmælum hér með til Isavia innanlandsflugvalla að takmarka notkun flugbrautar 13/31 þannig að flugbrautin sé ekki notuð til flugtaks og lendinga sem reynir á þá hindranafleti sem ekki eru hindranafríir. Þetta felur í sér að loka skal fyrir lendingar á flugbraut 13 og flugbraut 31, og að loka skal fyrir flugtök á flugbraut 13.

Með vísan í fyrri samskipti þá ítrekar Samgöngustofa að bannið nær einnig til sjúkraflugs. Nota má flugbraut 31 til flugtaks og til aksturs loftfara og ökutækja.

Tilskipun þessi skal taka gildi kl. 00:00 8. febrúar 2025. Tilskipunin gildir til 5. maí 2025 en verður aflétt þegar staðfest hefur verið af Isavia innanlandsflugvöllum að hindranafletir skv. Skipulagsreglum Reykjavíkurflugvallar séu hindranafríir ellegar að Isavia innanlandsflugvellir hafi auðkennt mögulegar mildunarráðstafanir sem Samgöngustofa hefur samþykkt.“

Upphaf málsins má rekja til tólf ára gamals samkomulags sem þáverandi samgönguráðherra, Ögmundur Jónasson, og þáverandi borgarstjóri, Jón Gnarr, gerðu þann 19. apríl 2013 milli ríkis og borgar. Þar segir:

„Að flugöryggi við notkun austur/vestur flugbrautar verði bætt með því annars vegar að séð verði til þess að gróður í Öskjuhlíðinni skagi ekki upp í hindranafleti núverandi flugbrautar og hins vegar að heimiluð verði uppsetning aðflugsljósa fyrir nákvæmnisblindflug vestan við brautina.“

Í síðasta mánuði tilkynnti Samgöngustofa Isavia að loka skyldi annarri flugbrautinni sem allra fyrst. Ástæðan væri sú að borgin hefði ekki fellt tré í Öskjuhlíð, sem Samgöngustofa teldi nauðsynlegt til að tryggja flugöryggi.

Í erindinu sem Isavia barst frá Samgöngustofu þann 9. janúar síðastliðinn segir að hætta skuli notkun flugbrautar 31 til lendinga og flugbrautar 13 til flugtaks vegna „afstöðu Reykjavíkurborgar að lúta ekki án frekari tafa gildandi skipulagsreglum hvað varðar hæð trjágróðurs.“

• Tilskipun_um_öryggi_ISI_Flugbraut_13_31_5PDF140KB
  Sækja skjal