Þakk­læti, auð­mýkt, rok og söngur ríkis­stjórnarinnar

Nokkrum sinnum áður hafa karlar og konur verið jafnmörg í ríkisstjórn. En nú eru konurnar sjö og hafa aldrei verið fleiri.

Þegar nýir ráðherrar mættu einn af öðrum til Bessastaða síðdegis var þakklæti og auðmýkt þeim flestum í huga. Þá komu þau mörg hver syngjandi út af ríkisráðsfundi líkt og farið var yfir í kvöldfréttum Stöðvar 2 og má sjá samantektina hér að neðan.

Mætir dansandi til leiks

Heimir Már Pétursson fréttamaður rifjaði upp þegar Logi Einarsson, nýr ráðherra menningar-, nýsköpunar- og háskólaráðherra, mætti á svæðið að hann hafi á sínum tíma hafið sinn feril sem dansari með Skriðjöklunum á Akureyri.

Verður dansað í ráðuneytinu?

„Já alveg örugglega. Svo getur vel verið að ég setji á sjóð fyrir endurmenntun eldri dansara,“ svaraði Logi kíminn. Hann segist jafnframt að öllu gamni slepptu að honum lítist vel á ráðuneytið og telur mikilvægt að efla nýsköpun í landinu.

Þorbjörg Sigríður Gunnlaugsdóttir dómsmálaráðherra vill meðal annars taka réttarkerfið föstum höndum. Hún tekur sérstaklega fram að baráttan gegn kynbundnu ofbeldi sé henni hugleikin.

„Auðmýkt“ flestum ofarlega í huga

„Ég finn fyrir miklu þakklæti en líka auðmýkt,” sagði Alma Möller heilbrigðisráðherra um það að taka sæti í ríkisstjórn. Fleiri tóku í afar svipaðan streng, þeirra á meðal Eyjólfur Ármannsson, samgöngu- og sveitarstjórnarráðherra. „Bara mjög vel, auðmjúkur og mikil ábyrgð,“ sagði hann spurður hvernig það leggst í hann að verða ráðherra. Sjálfur segist hann ætla að setja jarðgöng- og Sundabraut í forgang.

„Ég er bara mjög spenntur og auðmjúkur líka gagnvart þessu risastóra verkefni,“ sagði Jóhann Páll Jóhannsson umhverfis- orku og loftslagsráðherra jafnframt í samtali við fjölmiðla.

Daði Már Kristófersson er eini utanþingsráðherrann en hann hefur þó áður tekið sæti sem varaþingmaður. Nú er hann tekinn við embætti fjármála- og efnahagsráðherra. „Þetta leggst vel í mig, þetta er auðvitað mikil ábyrgð en ég er auðmjúkur gagnvart þessu verkefni,“ sagði Daði.

„Maður er bara rosalega stoltur og hrærður og ég bara hlakka mikið til. Þetta verður skemmtileg áskorun,“ sagði Ásthildur Lóa Þórsdóttir, nýr mennta- og barnamálaráðherra, sem segist afar ánægð með ráðuneytið sem hún fær í sinn hlut, enda kennari í grunninn svo málaflokkurinn stendur henni nærri.

„Þetta er svakalega mikilvægt ráðuneyti þannig að ég ber mikla virðingu fyrir því verkefni sem mér hefur verið falið og mun leggja mig mikið fram,“ sagði Hanna Katrín Friðriksson sem gegnir embætti atvinnuvegaráðherra.

Kristrún Frostadóttir, Þorgerður Katrín Gunnarsdóttir og Inga Sæland sem leiða stjórnarflokkana mættu saman í viðtal til Heimis Más strax að loknum ríkisráðsfundi á Bessastöðum en það vakti athygli að eftir að hafa kynnt stjórnarsáttmála á blaðamannafundi fyrr um daginn að þær féllust í faðma í stað þess að takast í hendur. „Samhenta ríkisstjórn,“ hafa þær talað um að þær ætli sér að leiða.

Stjórnarandstaðan klár í bátana

Ríkisstjórn Bjarna Benediktssonar var sömuleiðis leyst frá störfum á fyrri ríkisráðsfundi dagsins, en leiðtogar Sjálfstæðisflokks og Framsóknarflokks sem nú bíða verkefni í stjórnarandstöðu hafa ákveðnar efasemdir um margt það sem ný ríkisstjórn boðar.

„Mér fannst nú margt áhugavert, eða kannski sem ekki var,“ sagði Sigurður Ingi Jóhannsson, formaður Framsóknarflokksins, sem sagðist þó ætla að geyma frekari yfirlýsingar um stjórnarsáttmála nýrrar stjórnar.

Bjarni Benediktsson, formaður Sjálfstæðisflokksins sagði að stjórnarsáttmáli nýrrar ríkisstjórnar Samfylkingar, Viðreisnar og Flokks fólksins hafi komið honum á óvart. „[Þetta er] mjög þunn súpa, lítið í henni. Maður spyr sig, hvað varð um öll stóru málin?“ sagði Bjarni.

Lilja Alfreðsdóttir, varaformaður Framsóknarflokksins lýsti jafnframt áhyggjum af stöðu krónunnar á gjaldeyrismarkaði í kjölfar þess sem ný ríkisstjórn boðar.