Sigursælasti tenniskappi Suður-Kóreu þarf að fara í herinn

Í janúar fer Kwon í herinn og verður þar næstu átján mánuðina. Allir karlmenn í Suður-Kóreu á aldrinum 18-35 ára þurfa að gegna herþjónustu. Aðeins örfáar undantekningar eru veittar á því.

Kwon hefði getað sloppið við herþjónustuna ef hann hefði unnið gull á Asíuleikunum í fyrra. Hann datt hins vegar út í 1. umferð í einliðaleik og fékk brons í tvíliðaleik.

Hinn 27 ára Kwon stefnir á að snúa aftur af krafti á tennisvöllinn eftir að herþjónustunni lýkur.

Kwon er eini Suður-Kóreumaðurinn sem hefur unnið tvo ATP-titla. Hann hefur hæst komist í 52. sæti heimslistans í tennis.