Allar ís­lensku stelpurnar bjuggu til mark í góðum sigri

Katla Tryggvadóttir var bæði með mark og stoðsendingu í leiknum, Hlín Eiríksdóttir skoraði og Guðný Árnadóttir gaf stoðsendingu.

Hlín var mjög atkvæðamikil og átti að auki meðal annars skot í markrammann. Hún náði síðan að skora sitt tíunda deildarmark á leiktíðinni þegar hún nánast innsiglaði sigurinn á 76. mínútu.

Þetta var þriðji deildarsigur Kristianstad í röð en liðið er í fjórða sæti deildarinnar nú sjö stigum frá þriðja sætinu.

Katla og Guðný áttu báðar stoðsendingar á fyrstu 22 mínútum og það liðu bara þrjár mínútur á milli þeirra. Fyrst lagði Katla upp mark fyrir Carly Wickenheiser á 18. mínútu og svo lagði Guðný upp skallamark fyrir Alice Nilsson á 21. mínútu.

Hlín skoraði markið sitt á 76. mínútu og varð hún fimmti leikmaður deildarinnar til að brjóta tíu marka múrinn í sumar. Hlín hefur alls komið að fimmtán mörkum í sumar.

Gestirnir í AIK minnkuðu muninn í 3-1 skömmu síðar.

Katla skoraði fjórða og síðasta markið í uppbótatímanum. Hún kom því að tveimur mörkum í leiknum í dag. Katla er með þessu búin að eiga þátt í tíu mörkum á sinni fyrstu leiktíð sem atvinnumaður, hefur skorað sjö mörk og gefið þrjár stoðsendingar.

Guðný spilar kannski í vörninni en hún er þegar búin að gefa þrjár stoðsendingar í sumar.

Hafrún af velli á 16. mínútu

Hafrún Rakel Halldórsdóttir fór meidd af velli eftir aðeins sextán mínútur þegar Bröndby gerði markalaust jafntefli við Kolding í dönsku úrvalsdeildinni. Ingibjörg Sigurðardóttir spilaði allan leikinn.

Eftir þessi úrslit eru liðin jöfn að stigum með fimm stig hvort í fyrstu fimm leikjunum.  Þau sitja í 4. og 5. sætinu. Bröndby er í vandræðum með að skora enda aðeins með þrjú mörk í þessum leikjum.