Lögreglan hefur frá því í nóvember í fyrra haft málið til rannsóknar en þá féll akkeri skipsins frá borði með þeim afleiðingum að neysluvatnlögn HS Veitna til Vestmannaeyja skemmdist verulega. Áætlað er að viðgerð muni kosta um einn og hálfan milljarð og geti tekið allt að tvö ár. Fyrst var greint frá lokum rannsóknarinnar í Heimildinni.
„Við vorum að rannsaka þetta atvik sem átti sér stað í nóvember í fyrra,“ segir Karl Gauti í samtali við fréttastofu. Til skoðunar hjá lögreglu hafi verið til dæmis myndbandsupptökur úr skipinu. Þá fóru fram sjópróf í janúar sem hann segir hafa verið umfangsmikil.
Hann segir það ekki hafa verið efni rannsóknarinnar að athuga hvort að áhöfnin hafi verið allsgáð.
„Það er bara þetta atvik, þegar akkerið fer í vatnslögnina. Rannsóknin gengur út á það hvers vegna það gerðist og hvort það sé einhver sök hjá skipverjum, áhöfninni eða stjórnendum skipsins.“
Hann segir skaðabótaábyrgð algjörlega utan þeirra umfjöllunar, það eina sem lögregla hafi skoðað sé refsiábyrgðin.
Hafi vanrækt skyldur sínar
Bæjaryfirvöld ákváðu í sumar að leggja fram skaðabótakröfu á hendur Vinnslustöðinni. Framkvæmdastjóri Vinnslustöðvarinnar sagði í desember tvo skipstjórnarmenn hafa vanrækt skyldur sína þegar akkerið féll frá borði.
Guðmundur Ingi Guðmundsson og Gylfi Viðar Guðmundsson, skipstjórar sem skiptust á að gegna hlutverki skipstjóra og stýrimanns á túrum Hugins, voru í brúnni þegar akkerið olli skemmdunum. Samið var við þá um starfslok eftir innanhússskoðun Vinnslustöðvarinnar.
Sjá einnig: Segir skipstjórana tvo hafa vanrækt skyldur sínar
Þrjú hundruð þúsund á hvern íbúa
Íris Róbertsdóttir bæjarstjóri Vestmannaeyjabæjar sagði í júlí það hafa verið þung skref, að höfða mál gegn Vinnslustöðinni í Vestmannaeyjum. Bæjarfulltrúar væru þó ekki að sinna hlutverki sínu ef tekin yrði ákvörðun um að bæjarbúar ættu að greiða fyrir skemmdirnar.
„Það er reiknað með að viðgerðin á leiðslunni kosti einn og hálfan milljarð, og það er yfir 300 þúsund á hvern íbúa í Vestmannaeyjum. Við getum náttúrulega aldrei ekki látið á þetta reyna.“
Sigurgeir hefur í viðtölum áður sagt fyrirtækið bera bótaábyrgð í málinu og að það sé tryggt en að samkvæmt siglingalögum sé heimild til að takmarka tjónabæturnar við 360 milljónir.
Sjá einnig: „Í mínum huga alveg útilokað“
„Í tjóni sem þessu er það þannig að hámarksbætur eru til staðar. Þetta byggir á alþjóðalögum sem við heyrum undir. Sambærilegt atvik átti sér stað þegar skip sigldi niður brú í Bandaríkjunum, þar átti sama regla við. Bæturnar takmörkuðust við ákveðið hlutfall af verðmæti skipsins. Þannig eru bara reglurnar í þessu og lögin. Tryggingafélagið er annars bara með þetta mál,“ sagði Sigurgfsliteir í viðtali við Vísi í júlí.
Fréttin hefur verið leiðrétt. Fyrst stóð á einum stað að akkerið hefði slitnað. Það gerði það ekki. Það féll frá borði. Leiðrétt klukkan 11:29 þann 6.9.2024.
