Tveir stungnir í gistiskýlinu Granda

Þetta kemur fram í fréttaskeyti frá lögreglunni á höfuðborgarsvæðinu. Þar segir að lögreglu hafi borist tilkynning um að tveir aðilar hafi verið stungnir í gistiskýlinu, og þá hafi annar hinna særðu einnig verið rændur að sögn árásarþola. Tilkynningunni fylgdu þær upplýsingar að gerendur hafi verið tveir og þeir væru farnir af vettvangi.

„Stuttu seinna kom tilkynning frá vegfaranda um grunnsamlega hegðun stuttu frá vettvangi en þar var maður sem passaði við lýsingu að fela sig undir bifreið. Hann var handtekinn af lögreglu og vistaður vegna málsins,“ segir í tilkynningu lögreglu um málið. 

Ekki liggur fyrir að svo stöddu hvort fleiri meintra árásarmanna sé leitað. 

Handtekinn aftur eftir að hafa verið sleppt

Þá var aðili sem sleppt var úr haldi í morgun, eftir að hafa verið vistaður í fangageymslu í nótt, handtekinn á nýjan leik í dag. Sá hafði veist að starfsmanni íbúðarkjarna en komist undan lögreglu. Viðkomandi kom síðan aftur nokkru seinna og mun þá hafa reynt að brjóta sér leið inn í íbúðakjarnann þegar lögregla mætti á vettvang. Var hann þá handtekinn, aftur, og vistaður hjá lögreglu.

Loks segir í fréttaskeyti lögreglunnar að tilkynnt hafi verið um aðila sem hafi verið til vandræða á bar í miðborginni. Sá ku hafa veist að starfsmanni en var horfinn á brott þegar lögregla kom á staðinn.

Fréttin hefur verið uppfærð.