Vind­hviður gætu náð allt að 35 m/sek

Þetta kemur fram í tilkynningu frá Einari Sveinbjörnssyni veðurfræðingi Vegagerðarinnar.

Á vef Veðurstofunnar er nú í gildi gul viðvörun á Suðausturlandi vegna norðaustan hvassviðri.

„Norðaustan 13-20 m/s vestantil á svæðinu og snarpar vindhviður við fjöll, t.d. í Mýrdal og Öræfum. Getur verið varasamt fyrir ökutæki sem eru viðkvæm fyrir vindi,“ segir í viðvöruninni.

Ástæða vindstrengsins er nokkuð djúp lægð til austurs fyrir sunnan land, að því er fram kemur í hugleiðingum veðurfræðings. 

„Á sunnanverðu landinu verður rigning viðloðandi. Í öðrum landshlutum verður skýjað og búast má við dálítilli vætu öðru hvoru, einkum þegar líður á daginn. Hiti 6 til 12 stig í dag og því svalara en var í sólinni sunnan heiða í gær.“

Á morgun fimmtudag gera spár ráð fyrir að áðurnefnd lægð verði komin fyrir austan land. 

„Þá gengur í norðan stinningskalda nokkuð víða og bætir heldur í vindinn þegar líða fer að kvöldi. Á sunnanverðu landinu verður þurrt að kalla, en í öðrum landshlutum rigning eða súld og búast má við talsverðri úrkomu norðaustantil.

Á föstudag er síðan útlit fyrir allhvassan eða hvassan norðan vindstreng yfir vesturhelmingi landsins, en hægari vindur austantil. Meginþungi rigningarinnar færist yfir á Norðurland og Vestfirði.“