Úkraínu­menn vilji valda upp­lausn

Sérfræðingur í öryggis- og varnarmálum telur að með þessu reyni Úkraínumenn að draga herlið Rússa í burtu frá mikilvægum austurvígstöðvum og grafa undan stjórnvöldum í Rússlandi.

Þrettán eru sögð hafa særst þegar Rússar skutu niður úkraínska sprengju sem þá lenti á íbúðabyggingu í Kúrsk í Rússlandi í dag.

Atburðarásin hófst á þriðjudaginn þegar Rússar segja að allt að þúsund úkraínskir hermenn auk skriðdreka hafi farið yfir landamærin snemma að morgni.

Daginn eftir lýsa rússnesk yfirvöld yfir neyðarástandi í Kúrsk-héraði og Pútín Rússlandsforseti hélt neyðarfund með æðstu yfirmönnum her- og öryggismála.

Á fimmtudaginn berast fregnir af því að úkraínski herinn hafi náð nokkrum rússneskum þorpum á sitt vald. Á föstudag staðfestu vestrænir fjölmiðlar myndefni sem sýnir frá árangursríkum aðgerðum Úkraínumanna innan Rússlands og Rússar segjast senda hergögn til Kúrsk.

Það var svo fyrst í gærkvöldi sem Úkraínuforseti staðfesti með óbeinum hætti aðgerðir hersins innan landamæra Rússlands.

Úkraína geti náð fram réttlæti

„Syrskyi hershöfðingi hefur nú þegar greint nokkrum sinnum frá stöðunni á vígstöðvunum og aðgerðum okkar til að færa stríðið inn á yfirráðasvæði árásarríkisins. Ég þakka öllum deildum varnarliðs okkar sem hafa gert þetta mögulegt,“ sagði Volodomír Selenskí, forseti Úkraínu.

„Úkraína sannar nú að hún kann að ná fram réttlæti og tryggja nákvæmlega þann þrýsting sem þörf er á, þrýsting á árásaraðilann.“

Rússnesk hermálayfirvöld birtu í dag myndir sem sagðar eru sýna mótspyrnu Rússa þar sem skotið er á úkraínska skriðdreka í landamærahéraðinu Kúrsk.

Skyndiárásin hafi fjórþætt markmið

Arnór Sigurjónsson, sérfræðingur í öryggis- og varnarmálum, telur að Úkraínumenn reyni með skyndiárás sinni innan landamæra Rússlands að ná fjórum ólíkum markmiðum.

Það fyrsta sé að reyna að draga rússnesk herlið frá austurvígstöðvunum í kringum Kramatorsk og upp til Kúrsk. Talið er að á milli tíu og fimmtán þúsund úkraínskir hermenn taki þátt í aðgerðunum og Rússar þurfi þannig að beita umtalsverðu herliði til að ná tökum á ástandinu innan landamæra sinna.

„Í öðru lagi þá tel ég að Úkraínumenn vilji valda upplausn og ótta í Kúrsk-héraðinu og í landamærahéruðunum hjá almenningi og veikja rússnesk stjórnvöld sem þurfa að svara þeirri spurningu af hverju eru landamærahéruðin ekki varin,“ sagði Arnór í kvöldfréttum Stöðvar 2. Árásin hafi greinilega komið rússneska hernum í opna skjöldu.

Hann telur sömuleiðis að stjórnvöld í Úkraínu vilji með þessu efla baráttuþrek hermanna sinna og sýna heiminum að Úkraínuher hafi bolmagn til þess að verja landið og gera Rússum verulega skráveifu.

Búið að flytja 76 þúsund Rússa frá svæðinu

Arnór segir að skyndiárásin hafi valdið Rússum skaða og veikt orðspor yfirvalda í Kreml.

„Það er brottflutningur 76 þúsund Rússa frá þessu átakasvæði og fólkið spyr: „Hvar er rússneski herinn? Af hverju er ekki verið að verja landamæri landsins?““

Ef Úkraínumönnum takist að draga herlið Rússlands frá austurvígstöðvunum upp til Kúrsk til að bregðast við skyndiárásinni hafi þeir náð miklum árangri.

Vestrænir leiðtogar nú hliðhollari árásum á rússneskri grundu

Lengi vel mældist andstaða hjá bandamönnum Úkraínu gegn því að nota þau vopn sem send hafa verið til landsins innan landamæra Rússlands. Arnór telur að þetta hafi breyst á leiðtogafundi Atlantshafsbandalagsins (NATO) í júlí.

„Það sé svona meiri stemning og skilningur á því að Úkraínumenn þurfa að geta athafnað sig utan eigin landamæra til að gera árásir á birgðastöðvar rússneska hersins, flugvelli og önnur hernaðarleg skotmörk. Hversu mikið af vestrænum búnaði og tækjum eru í notkun núna í þessari skyndiárás liggur ekki fyrir,“ segir Arnór Sigurjónsson, sérfræðingur í öryggis- og varnarmálum.