Bielsa bauð upp á rosa­legan reiði­lestur

Bielsa ræddi þarna hegðun leikmanna landsliðs Úrúgvæ sem tóku þátt í stúkuslagsmálunum við stuðningsmenn Kólumbíu eftir tapið á móti Kólumbíu í undanúrslitum Suðurameríkukeppninnar.

Auk þessa aus Bielsa úr skálum reiði sinnar þegar kom að Knattspyrnusambandi Suður Ameríku, CONMEBOL, og skipulagi keppninnar í ár en hún var spiluð í Bandaríkjunum. Öryggismál og grasvellirnir fengu vænan skammt af gagnrýni frá fyrrum stjóra Leeds United.

Blaðamannafundurinn var haldinn fyrir leik Úrúgvæ og Kanada um þriðja sætið á mótinu.

Komu fjölskyldum sínum til bjargar

Liverpool leikmaðurinn Darwin Núnez var sá sem gekk lengst í stúkuslagsmálunum en fleiri leikmenn ruku líka upp í stúku. José María Giménez, fyrirliði liðsins, talaði um það að leikmennirnir hefðu í raun verið að koma fjölskyldum sínum til bjargar. Honum var mikið niðri fyrir í viðtalinu eftir leikinn og augljóslega brugðið.

Knattspyrnusamband Suður Ameríku hefur þegar hafið rannsókn á atvikinu. Við það bætist að leikmönnum Úrúgvæ og Kólumbíu lenti saman eftir lokaflautið. Það er hætta á því að leikmenn verði dæmdir í bann og knattspyrnusamböndin fái stórar sektir.

„Þegar ég fer að tala um þetta þá verð ég líka að hugsa um þær hótanir sem ég mun fá. Það eina sem ég get í raun sagt er að allir hefðu gert það sama í sömu aðstæðum,“ sagði Bielsa.

Hvað hefðu þið gert?

„Þið verðið að horfa á hvað var að gerast. Þeir voru að ráðast á kærustur þeirra, mæður þeirra, á lítið barn, eiginkonur þeirra. Hvað hefðu þið gert?“ spurði Bielsa.

Bielsa var líka ósáttur með einhliða umfjöllun um þátt sinna leikmanna í atvikinu. Hann sagði að leikmennirnir ættu í raun skilið að fá afsökunarbeiðni og skaut um leið á öryggisgæsluna. „Við eigum að vera í Bandaríkjunum, þjóð öryggisins. Ef það er einhver sem ætti að fá sekt þá væru það þeir sem áttu að tryggja öryggi fólks inn á vellinum,“ sagði Bielsa.

Fólk frá Úrúgvæ í miklum minnihluta

„Þessi leikur fór fram á leikvangi þar sem fólk frá Úrúgvæ var í miklum minnihluta. Flest þeirra voru fjölskyldur og það er ljóst að það var ófullnægjandi öryggisgæsla á staðnum. Ef við horfum á þessar staðreyndir þá var hegðun leikmanna minna óhjákvæmileg og náttúruleg,“ sagði Bielsa sem sagðist þó vera alltaf á móti öllu ofbeldi.

Bielsa gekk líka mjög langt í því að gagnrýna CONMEBOL og bandaríska knattspyrnusambandið fyrir umgjörð keppninnar ekki síst vegna lélegrar öryggisgæslu og slæms ástand leikvallanna sem eru vanalega notaðir af NFL-liðum.

Grasvellirnir voru oft á tíðum lagðir nokkrum dögum fyrir leikina og vellirnir því mjög lausir í sér. Landsliðsþjálfari Argentínu gagnrýndi það einu sinni en Bielsa vildi meina að það væri þaggað niðri í alla gagnrýni á allt slíkt. Bielsa kallaði skipuleggjendurna lygara og fór mikinn eins og sjá má brot af hér fyrir neðan.