Bláa lónið opnar aftur á morgun

Í tilkynningunni segir að lögreglustjóri hafi farið yfir öryggismál með sínum viðbragðsaðilum og öryggisstjórum Bláa Lónsins.

„Flóttaleiðir eru nú tvær frá Bláa Lóninu en eins og kunnugt er rann hraun yfir Bláalónsveg og Nesveg sem var önnur tveggja flóttaleiða frá lóninu. Hefur nú verið bætt úr því í samstarfi Bláa Lónsins og HS Orku en einbreiður malarvegur frá Svartsengi tengist Nesvegi vestan Grindavíkur. Þessi malarvegur er lokaður fyrir almennri umferð. Sem fyrr aka gestir og starfsmenn lónsins Reykjanesbrautina og síðan Grindavíkurveg inn að Bláa lóninu,“ segir í tilkynningunni.

Þá segir að á svæðinu sé þéttriðið net gasmæla og veðurstöð sé staðsett á einni byggingu lónsins. Eftirlit og viðbragð við hugsanlegri gasmengun sé nú með allt öðrum hætti en áður hafði verið á starfssvæði Bláa Lónsins. 

Bent er á það að ekki sé heimilt fyrir almenning að ganga inn á gossvæðið frá bílastæðum Bláa Lónsins eða frá Grindavíkurvegi.