Fara beint í frí­stund eftir leik­skóla­út­skrift í júní

Leik- og grunnskólarnir sem erum ræðir eru allir í Norðlingaholti, Grafarvogi og Breiðholti. Gert er ráð fyrir að bjóða upp á sumarfrístund fyrir börnin á tveimur tímabilum, frá 10. júní til 5. júlí og 6. ágúst til 20. ágúst næstkomandi eða í 31 dag. Eftir það er skólasetning og grunnskólaganga barnanna formlega hafin.

Opnunartími í sumarstarfi frístundaheimila er kl. 8:30-16:30. Foreldrar geta valið annað hvort tímabilið eða bæði. Verkefnið hefst í júní 2024 og verður að því loknu metið og tekin ákvörðun í borgarráði um framhaldið.

„Þetta er tilraunaverkefni sem við höfum verið að útfæra. Við prófuðum þetta fyrst á síðasta ári í sex skólum og það gaf góða raun. Þá byrjuðum við eftir sumarlokun en það kom fram sú tillaga að útfærslu að byrja eftir útskrift í leikskólum sem eru alla jafna að vori,“ segir Helgi Grímsson sviðstjóri skóla- og frístundasviðs Reykjavíkurborgar. Því byrja þau í júní á þessu ári að þessu sinni. Hann segir þetta gert í sveitarfélögum í kring og hafi gengið vel þar.

Börnin tilbúin í þessa breytingu

Hann segir mörg barnanna mjög tilbúin í þessa breytingu. Hingað til hafi útskriftir verið að vori eða snemmsumri en svo hafi börnin þurft að halda áfram í leikskólanum og sum jafnvel þurft að fara aftur í leikskólann að sumarlokun lokinni.

„Þau eru spennt að fara í breytingar og við erum að horfa til þess að þau verði í frístundaheimilunum og í húsnæði grunnskólanna. Fyrst um sinn verður blanda af starfsfólki leikskóla og frístunda en svo eftir sumarlokun verður blanda af starfsfólki grunnskóla og frístundaheimila,“ segir Helgi.

Í tilraunaverkefninu er gert ráð fyrir því að þeir starfsmenn sem hafa fylgt börnum í sérstökum stuðningi fylgi börnunum yfir í frístund. „Viðkvæmustu börnin verða með allan þann stuðning sem þau hafa notið í leikskólanum.“

Hann segir að með því að stækka tilraunaverkefnið núna fái þau meiri upplýsingar og reynslu en að stefnan sé að þetta verði gert í öllum leik- og grunnskólum Reykjavíkur. Hann segir að margir leikskólar hafi hingað til verið með einhvers konar uppbrot fyrir þessi elstu börn sumarið fyrir grunnskólagöngu þeirra. Hann nefnir sem dæmi leikskólann Hof í Laugardal sem hafi verið með verkefnið „Flakkarar“. Í því verkefni hafi börnin verið í vettvangsferðum síðasta sumar sitt í leikskóla.

„Þetta er mjög tengt því sem við þekkjum úr frístundaheimilunum og rímar því ágætlega við þessar kennsluaðferðir. Krakkarnir eru að stækka og gaman fyrir þau að fara í meira krefjandi aðstæður, sem langflest þeirra þrá á þessum tíma,“ segir Helgi.

Tillaga um þetta tilraunaverkefni var samþykkt í skóla- og frístundaráðs þann 12. febrúar og segir í bréfi til foreldra, sem sent var út í gær, að tillagan eigi að svara reglubundinni umræðu um að börn snúi ekki aftur í leikskóla að loknu sumarleyfi, heldur taki þátt í starfi frístundaheimilis fram að skólasetningu.

Tillagan sem samþykkt var á fundi skóla- og frístundaráðs hljóðar svo: Lagt er til að hafa framhald á tilraunaverkefninu „fyrr í frístundaheimili“ sem var starfrækt s.l. sumar í þremur frístundaheimilum og bæta við fleiri starfstöðvum sumarið 2024. Auk þess að bæta við starfsstöðvum myndi verkefnið byrja við skólalok grunnskóla í byrjun júní til skólasetningar. Lokað yrði í 3 vikur í júlí og fyrstu viku í ágúst. Verkefnið snýr að börnum sem eru að ljúka leikskóla og hefja grunnskólagöngu í haust 2024.

Skrefið ánægjulegra úr leikskóla í grunnskóla

Þar kemur einnig fram að í greinargerð með tillögunni sé fjallað um það að með því að opna frístundaheimilin og grunnskólana fyrir þennan hóp nýrra nemenda sé hægt að stuðla betur að því að skrefið úr leikskóla í grunnskóla verði sem ánægjulegast. Starfsfólki frístundaheimila og grunnskóla gefist auk þess rými til að mæta börnum og foreldrum í næði áður en starf grunnskólanna hefst af fullum þunga um haustið.

Helgi segir að öllum börnum eigi að vera tryggt pláss í frístund. Það sé ekki háð mönnun. Það hafi ekki verið erfitt að manna frístund að sumri því þá er hægt að bjóða fullt starf. Foreldrar geti því allir gert ráð fyrir því að fá pláss á þeirri frístund sem tilheyrir þeim skóla sem barnið mun ganga í.

Helgi segir að þegar börnin fara yfir í frístundina verði unnið að því í leikskólunum að flytja börn á aðrar deildir og svo í kjölfarið verði hægt að hefja aðlögun hjá börnum sem bíða þess að komast inn.

„Við vonumst til þess að yngri börn komist fyrr inn í leikskóla,“ segir Helgi.

Hann hefur samt sem áður skilning á því að ekki öllum finnist þetta eins spennandi. Skóla- og frístundasvið hafi leitað til foreldraráða leikskólanna og óskað umsagna frá þeim. Hann segir viðbrögð foreldraráðanna að mestu hafa verið jákvæð. Þau hafi auðvitað verið með einhverjar áhyggjur eins og af því að börnin þurfi að koma með nesti, af kostnaði og opnunartíma. Helgi segir þó stuðst við gjaldskrá leikskólanna og að frístundin sé opin klukkutíma styttra en leikskólar, eða frá 8.30 í stað 7.30.

Kostnaður verður vegna 20 daga fyrir sumarlokun 31.400 krónur fyrir foreldra í flokki eitt og 20.724 krónur fyrir foreldra í flokki tvö. Fyrir ellefu daga í ágúst greiða þau svo 17.300 krónur í flokki eitt og 11.418 krónur í flokki tvö.

Foreldrar ánægðir með leikskólana

Helgi hefur skilning á því að fólki gæti þótt þessi breyting erfið.

„Menn vita hvað þeir hafa í leikskólunum og foreldrunum í borginni líður svo vel með leikskólana sína. Börnin eru svo alsæl þannig það er eðlilegt að menn séu hikandi en reynslan frá öðrum sveitarfélögum er mjög góð og reynslan af tilraunaverkefninu frá því í fyrra sömuleiðis. Það er mikilvægt að halda áfram að þróa okkar starf og koma til móts við breyttar aðstæður og ákall um að yngri börn komist fyrr inn í leikskólana okkar. Þetta getur verið liður í því að auðvelda það verkefni.“

Helgi segir að eftir að tillagan var samþykkt í skóla- og frístundaráði hafi sviðinu verið falið að velja starfsstöðvar auk þess sem bera þurfti málið undir foreldraráðin. Umsagnarbeiðnir hafi verið sendar fyrir páska og þau hafi þurft tíma til að svara.

„Við munum vaka vel yfir þessu og höfum skilning á því að margir séu óöruggir og sáttir með það sem þau hafa. En við erum að reyna að þróa starfið.“

Þeir leik- og grunnskólar sem taka þátt í verkefninu eru:

Norðlingaholt:

Norðlingaskóli, frístundaheimilið Klapparholt og leikskólinn Rauðhóll.

Grafarvogur:

Borgaskóli, frístundaheimilið Hvergiland, leikskólinn Hamrar og leikskólinn Hulduheimar. Engjaskóli, frístundaheimilið Brosbær og leikskólinn Engjaborg. Foldaskóli, frístundaheimilið Regnbogaland, leikskólinn Funafold og leikskólinn Sunnufold. Hamraskóli, frístundaheimilið Simbað og leikskólinn Klettaborg. Húsaskóli, frístundaheimilið Kastali og leikskólinn Brekkuborg. Rimaskóli, frístundaheimilið Tígrisbær, leikskólinn Laufskálar, leikskólinn Fífuborg og leikskólinn Lyngheimar.

Breiðholt:

Breiðholtsskóli, frístundaheimilið Bakkasel, leikskólinn Bakkaborg og leikskólinn Borg. Seljaskóli, frístundaheimilið Vinasel, leikskólinn Hálsaborg og leikskólinn Jöklaborg. Ölduselsskóli, frístundaheimilið Vinaheimar, leikskólinn Seljaborg og leikskólinn Seljakot.

Stefnt er að því að opna fyrir skráningu þann 23. apríl næstkomandi og fer hún fram á vefnum http://sumar.fristund.is