Alex Freyr mættur heim í Fram

Hægri bakvörðurinn Alex Freyr lék með Fram allan sinn feril áður en Breiðablik festi kaup á leikmanninum fyrir sumarið 2023. Hann náði ekki að festa sig í sessi með Blikum og lék aðeins átta leiki áður en hann var lánaður til KA.Þar lék hann þrjá leiki áður en hann meiddist og missti af lokakafla síðasta tímabils.

Ljóst er að hinn 26 ára gamli Alex Freyr styrkir Fram til muna en það verður áhugavert að sjá hvar nýr þjálfari liðsins, Rúnar Kristinsson, mun stilla leikmanninum upp. Alex Freyr hefur undanfarin ár spilað sem hægri bakvörður en Rúnar sótti Kennie Chopart frá sínu gamla félagi KR fyrir ekki svo löngu síðan.

Aðrir leikmenn sem eru gengnir í raðir Fram eru Kyle McLagan frá Íslands- og bikarmeisturum Víkings, Þorri Stefán Þorbjörnsson á láni frá Lyngby og Freyr Sigurðsson frá Sindra.

Þá greindi Fótbolti.net frá því að Þorsteinn Emil Jónsson, tvítugur miðjumaður Vals, væri að æfa með Fram og talið sé líklegt að hann semji við félagið.

Fram hefur tímabilið í Bestu deildinni þann 7. apríl þegar liðið fær nýliða Vestra í heimsókn.