Innlent

Ó­vissa um út­boð næsta á­fanga á Dynjandisheiði

Kristján Már Unnarsson skrifar
Hluti verksins er kaflinn af Dynjandisheiði og niður í Dynjandisvog. Þarna verður mesta breytingin á veglínu en hún fylgir að öðru leyti núverandi vegstæði að mestu.
Hluti verksins er kaflinn af Dynjandisheiði og niður í Dynjandisvog. Þarna verður mesta breytingin á veglínu en hún fylgir að öðru leyti núverandi vegstæði að mestu. Vegagerðin

Útboð þriðja áfanga Vestfjarðavegar um Dynjandisheiði er í óvissu. Til stóð að bjóða verkið út í febrúar en núna fást óljós svör frá Vegagerðinni um hvort búið sé að fresta útboðinu og hve lengi því muni seinka.

Lokaáfanginn á leiðinni milli Flókalundar og Dynjanda er kaflinn milli Dynjandisvogar og sýslumarka á heiðinni. Samkvæmt svari sem fréttastofan fékk í janúar frá Vegagerðinni var stefnt á útboð þessa áfanga núna í febrúar. Miðað var við að framkvæmdir gætu hafist í vor og að verklok gætu orðið sumarið 2026.

Leiðin um Dynjandisdal. Veglínan þar fylgir að mestu núverandi vegi.Vegagerðin

Þegar fréttastofan spurðist fyrir um það hversvegna ekki væri búið að auglýsa útboðið, hvort búið væri að fresta útboðinu og þá hve lengi fékkst eftirfarandi svar frá upplýsingafulltrúa Vegagerðarinnar:

„Þetta er svo sem allt í vinnslu en útboðið verður ekki alveg strax,“ svaraði G. Pétur Matthíasson.

-Hvenær má búast við að þessi áfangi verði boðinn út? Hver er ástæðan fyrir frestun?

„Get ekki sagt á þessari stundu hvenær verður boðið út, þau mál eru enn til skoðunar hér innanhúss og ekki komin niðurstaða,“ svaraði upplýsingafulltrúi Vegagerðarinnar.

Svona verða gatnamótin að fossinum Dynjanda. Til vinstri sést hvernig vegurinn verður lagður upp úr Búðavík í Dynjandisvogi. Til hægri sést veglína upp Dynjandisdal.Vegagerðin

Í yfirliti sem birt var þann 1. mars á heimasíðu Vegagerðarinnar um stöðu framkvæmda á Vestfjarðavegi segir að vonast sé til að þriðji og síðasti áfanginn á Dynjandisheiði verði boðinn út fyrir lok árs.

Vinnu Suðurverks við annan áfanga vegarins yfir Dynjandisheiði miðar vel og segir Vegagerðin stefnt að því að verkinu verði lokið um miðjan júlí í sumar. Fari svo að útboð næsta áfanga frestist að ráði þýðir það að samfella í verkinu rofnar.

Leiðin upp Dynjandisdal meðfram Svíná.Vegagerðin

Á Vestfjarðavegi um Gufudalssveit hóf Borgarverk í lok janúar vinnu við nýjan vegarkafla við Skálanes og niður að sjó við Melanes. Í framhaldi verður farið í sjávarfyllingar í Gufufirði og svo byggingu bráðabirgðabrúar yfir Gufufjörð. Verklok þessa áfanga eru áætluð í lok september 2025.

Þetta er fyrsti áfangi í þverun Djúpafjarðar og Gufufjarðar. Í yfirlitsfrétt sinni segist Vegagerðin vonast til að hægt verði að bjóða út smíði brúanna síðla þetta ár.

Stöð 2 kynnti sér framkvæmdir Suðurverks á Dynjandisheiði síðastliðið haust og sýndi þá þessa frétt:

Vegagerð Samgöngur Ísafjarðarbær Vesturbyggð Ríkisstjórn Katrínar Jakobsdóttur Umferðaröryggi Byggðamál

Tengdar fréttir

Bæjarstjórn kaus milliveginn sem vegstæði við Dynjanda

Niðurstaða virðist fengin um hvernig Vestfjarðavegur verður lagður við fossinn Dynjanda en tekist var á um tvær mismunandi veglínur í gegnum friðlandið. Bæjarstjórn Ísafjarðarbæjar valdi að fara milliveginn.

Nýr kafli með bundnu slitlagi að opnast á Dynjandisheiði

Stefnt er að því að nýr vegarkafli á Dynjandisheiði með bundnu slitlagi verði tekinn í notkun eftir næstu helgi. Kaflinn er 3,5 kílómetra langur og liggur um hæsta hluta fjallvegarins milli núverandi slitlagsenda við Norðdalsá, norðan Bíldudalsgatnamóta, og Vatnahvilftar neðan Botnshests ofan Geirþjófsfjarðar.

Lægsta boð í Vestfjarðaveg langt undir kostnaðaráætlun

Tilboð í næsta áfanga Vestfjarðavegar um Gufudalssveit, vegfyllingu yfir Gufufjörð og Djúpafjörð, voru opnuð hjá Vegagerðinni í dag og reyndist lægsta boð aðeins 74 prósent af kostnaðaráætlun. Brúin yfir Þorskafjörð verður tekin í notkun síðar í þessum mánuði, átta mánuðum á undan áætlun.

Vonbrigði á Vestfjörðum og áfall í Árneshreppi vegna niðurskurðar

Niðurskurður samgönguáætlunar seinkar uppbyggingu Vestfjarðahringsins um þrjú ár sem veldur Fjórðungssambandi Vestfirðinga miklum vonbrigðum. Í Árneshreppi eru íbúar í áfalli vegna áforma um að slá af marglofaðar vegarbætur, sem áttu að hefjast á næsta ári.

Dynjandisheiði ekki í útboð á þessu ári vegna fjárskorts

Vegagerðin hefur fallið frá því að bjóða út stærsta áfanga nýs vegar yfir Dynjandisheiði í sumar þar sem ekki eru til peningar í verkið. Áformað er þó að bjóða út næsta áfanga vegagerðar um Gufudalssveit í haust.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið