Innlent

Eig­andi Vy-þrifa grunaður um man­sal og peninga­þvætti

Kolbeinn Tumi Daðason skrifar
Ferðamenn sem voru á ferðinni í dag komu að lokuðum dyrum á Herkastalanum síðdegis.
Ferðamenn sem voru á ferðinni í dag komu að lokuðum dyrum á Herkastalanum síðdegis. Vísir/vilhelm

Miðlæg rannsóknardeild lögreglu lagðist í umfangsmiklar aðgerðir víða um land í dag. Grunur um mansal, peningaþvætti og skipulagða glæpastarfsemi leiddi til aðgerða á höfuðborgarsvæðinu, Suðurlandi, Suðurnesjum og Norðurlandi og standa þær enn yfir.

Meðal annars í Herkastalanum í Kirkjustræti þar sem rekið er gistihúsið Kastali Guesthouse.

Samkvæmt heimildum fréttastofu var gestum á gistihúsinu vísað út úr byggingunni sem hefur leyfi fyrir 125 gestum. Það er í eigu Davíðs Viðarssonar sem komist hefur í fréttir undanfarnar vikur og mánuði vegna fyrirtækja sinna Vy-þrifa, Pho Víetnam og Wok On.

Veistu meira um málið? Sendu okkur línu á ritstjorn@visir.is.

Þessi skilaboð bíða gesta á Kastala Hostel.Vísir/vilhelm

Í tilkynningu frá lögreglu seint á fimmta tímanum kemur fram að lögreglan standi nú fyrir umfangsmiklum aðgerðum í umdæminu og utan þess vegna rökstudds gruns um mansal, peningaþvætti, brotum á atvinnuréttindum útlendinga og gruns um skipulagða brotastarfsemi. Aðgerðirnar hafi hafist fyrir hádegi og muni standa yfir fram eftir degi. Í þeim felist m.a. að ráðist er í húsleitir á fjölmörgum stöðum.

Kastali Guesthouse í Kirkjustræti er innsiglað með bláu teipi.Vísir/vilhelm

Aðgerðirnar eru unnar í samvinnu við lögregluliðin á Suðurlandi, Suðurnesjum og Norðurlandi eystra, embætti ríkislögreglustjóra, Tollgæsluna, Útlendingastofnun, Vinnumálastofnun, ASÍ, velferðarsvið Reykjavíkurborgar, barnaverndaryfirvöld í Reykjavík, Kópavogi og Hafnarfirði, félagsþjónustuna í Kópavogi og Hafnarfirði, heilbrigðiseftirlit Reykjavíkur, Slökkvilið höfuðborgarsvæðisins og Bjarkarhlíð.

Upphaf málsins má rekja til þess að heilbrigðiseftirlitið fékk ábendingu sem leiddi til þess að ólögleg matvælageymsla fannst í kjallara í Sóltúni í Reykjavík. Í kjölfarið fór eftirlitið í óboðnar heimsóknir á nokkra veitingastaði Pho Víetnam í Reykjavík og fengu tveir þeirra falleinkunn eftirlitsins.

Meðal þess sem fannst í matvælageymslunni voru dýnur og uppsett tjald. Komið hefur fram að hluti af rannsókn lögreglu snýr að meintu mansali.

Hvorki næst í Kastali Guest House né Reykjavík Downtown Hostel sem Davíð rekur við Skólavörðustíg 42 fyrir ofan Pho Víetnam. Þá er útibú Pho Víetnam á Suðurlandsbraut lokað en það er allajafna opið á þessum tíma.

Reykjavík Downtown Hotel á Skólavörðustíg 42 hefur verið innsiglað. Vísir/vilhelm

Grímur Grímsson yfirlögregluþjónn miðlægu rannsóknardeildar lögreglu vildi ekki tjá sig um málið þegar eftir því var leitað. Von sé á tilkynningu vegna málsins. Þá barst fréttastofu ábending að lögregla hefði lokað starfsemi Wok On í Krónunni á Akureyri á þriðja tímanum í dag.

Fram kemur á heimasíðu Wok On að allir staðir keðjunnar séu lokaðir. 

Gunnar Rúnar Sveinbjörnsson, upplýsingafulltrúi lögreglu, segir ekki tímabært að upplýsa hve margir hafi verið handteknir í aðgerðunum.

Eldjárn Árnason lögmaður, sem talað hefur máli Davíðs Viðarssonar lögmanns þegar matvælalagerinn í Sóltúni fannst, segist ekki geta tjáð sig um málið.

Uppfært klukkan 16:50 með tilkynningu lögreglu.

Lögreglan á höfuðborgarsvæðinu stendur nú fyrir umfangsmiklum aðgerðum í umdæminu og utan þess vegna rökstudds gruns um mansal, peningaþvætti, brotum á atvinnuréttindum útlendinga og gruns um skipulagða brotastarfsemi. Aðgerðirnar hófust fyrir hádegi og munu standa yfir fram eftir degi, en í þeim felst m.a. að ráðist er í húsleitir á fjölmörgum stöðum.

Aðgerðirnar eru unnar í samvinnu við lögregluliðin á Suðurlandi, Suðurnesjum og Norðurlandi eystra, embætti ríkislögreglustjóra, Tollgæsluna, Útlendingastofnun, Vinnumálastofnun, ASÍ, velferðarsvið Reykjavíkurborgar, barnaverndaryfirvöld í Reykjavík, Kópavogi og Hafnarfirði, félagsþjónustuna í Kópavogi og Hafnarfirði, heilbrigðiseftirlit Reykjavíkur, Slökkvilið höfuðborgarsvæðisins og Bjarkarhlíð.

Ekki er hægt að veita frekari upplýsingar að svo stöddu.

Fréttin hefur verið uppfærð.

Veistu meira um málið? Vísir tekur við öllum ábendingum á netfangið ritstjorn@visir.is eða í tölvupósti á einstaka blaðamenn. Fullum trúnaði er heitið.

Lögreglumál Ólöglegur matvælalager í Sóltúni Mál Davíðs Viðarssonar

Tengdar fréttir

Vy-þrif kærð til lögreglu

Heilbrigðiseftirlit Reykjavíkur hefur kært þriffyrirtækið Vy-þrif til lögreglu fyrir ólöglega matvælageymslu í kjallara í Sóltúni í Reykjavík. Fyrirtækið hafði frest til 14. nóvember til að bregðast við erindi eftirlitsins en gerði það ekki.

Wok On sver af sér tengsl við lagerinn

Talsmaður veitingastaðakeðjunnar Wok On segir sárt að heyra að búið að sé að bendla veitingastaðinn við ólöglegan matvælalager í Sóltúni í Reykjavík. Eigandi lagersins komi ekki að daglegum rekstri Wok On en eigi þó hlut í tveimur útibúum keðjunnar og sjái Wok On fyrir húsnæði.

Flúðu á hlaupum eða bíl í fyrstu heimsókn

Fyrsta heimsókn starfsfólks Heilbrigðiseftirlits Reykjavíkur (HER) í geymslurými í kjallaranum í Sóltúni 20 virðist hafa komið fólki á svæðinu í opna skjöldu. Þeir tóku á rás og ekki náðist að ræða við þá.

Starfsfólk Vy-þrifa reyndi að koma matvælum undan

Tæplega fimm tonn af matvælum sem höfðu nýlega verið flutt til Íslands voru á meðal þeirra sem fundust í geymslu í kjallara húsnæðis við Sóltún í Reykjavík í lok september. Þá eru vísbendingar um að fólk hafi dvalið í geymslunni og er sá angi málsins kominn á borð lögreglu.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið