Skilur ör­væntinguna en segir málið flókið og í skoðun

Hópur Palestínumanna hefur stækkað tjaldbúðirnar á Austurvelli til að knýja stjórnvöld til að bjarga fjölskyldum sínum sem eru fastar á Gasasvæðinu en hafa dvalarleyfi á grundvelli fjölskyldusameiningar.

„Við erum með leyfi frá borginni til að vera með tjaldbúðirnar á Austurvelli þannig að við fengum að láni stórt veislutjald sem við höfum komið fyrir því við erum að áforma að stækka töluvert við tjaldbúðirnar og fara með þetta á annað stig. Við viljum hamra járnið á meðan það er heitt,“ segir Askur Hrafn Hannesson sem er fólkinu innan handar. 

Fólkið vill að ráðmenn Íslands fullnýti vald sitt til að koma fólkinu út af Gasa og til Íslands sem fyrst. Tíminn vinni ekki með íbúum Gasa.

Tíminn á þrotum

„Staðan er bara sú að ef það er drollað of lengi við að framkvæma fjölskyldusameininguna þá munu bara ekki vera eftirlifandi fjölskyldumeðlimir þegar loks kemur að því,“ segir Askur en þeir ráðherrar sem málið varðar funduðu um stöðu fólksins sem fast er inná Gasasvæðinu fyrir ríkisstjórnarfund í morgun.

Guðmundur Ingi Guðbrandsson, félagsmálaráðherra, segist hafa skilning á kröfu fólksins.

„Auðvitað skilur maður þá örvæntingu sem gripur um sig hjá fólki vitandi af fjölskyldumeðlimum inn á svæðinu en málið er alls ekki einfalt vegna þess að fólk kemst ekki auðveldlega út af svæðinu.“

Það blasi við tvenns konar áskoranir, annars vegar að koma fólkinu út af Gasa og hins vegar inn til Kaíró. En leiðin ætti að vera tiltölulega greið til Íslands ef fólkið kemst til Kairó vegna samnings Íslands við Alþjóðafólksflutningastofnunina.

Ýmsir möguleikar í skoðun

„Við erum að skoða ýmsa möguleika og fylgjumst mjög vel líka með því hvað önnur ríki eru að gera, ein sog nágrannaþjóðir okkar þannig að almennt séð vil ég bara segja að við höldum því áfram að skoða hvaða möguleikar kunna að vera í stöðunni,“ segir Guðmundur Ingi.

Guðmundur segir að Norðurlandaþjóðirnar hafi, ólíkt Íslandi, ekki veitt fleiri dvalarleyfi eftir 7. október.

„Mér skilst að Norðurlöndin hafi verið að aðstoða eigin ríkisborgara við að komast yfir landamærin og fólk sem hefur fengið dvalarleyfi fyrir 7. október af svæðinu. Það sem hafði áður verið komið til ríkja eins og Svíþjóðar en hafði aftur farið inn á svæðið. Það er dálítið mismunandi með hvaða hætti ríki eru að aðstoða fólk en ég veit ekki til þess að það sé verið að aðstoða fólk sem hefur nýlega fengið fjölskyldusameiningar,“ segir Guðmundur.

Heilmikil seigla í fólkinu

En aftur að fólkinu sem stendur fyrir mótmælaaðgerðinni á Austurvelli. Askur var spurður hvernig fólkinu liði, hvort því væri ekki allt og kalt þegar á þriðja sólarhringinn væri liðið af aðgerðinni.

„Jú, það er vissulega mjög kalt en við erum mjög vel klædd og það er hlýtt inn í tjöldunum og við erum mjög vel búin en svo er náttúrulega bara baráttuandinn í hámarki og palestínska flóttafólkið er eitt þrautseigasta fólk sem þú finnur og baráttuviljinn hjá þeim er ótrúlegur,“ segir Askur.

Andleg þolraun að vita af fólkinu sínu í hættu

Síma-og netsamband sé stopult á Gasa og að það líði oft nokkrir dagar á milli þar til frá þeim heyrist. Þetta hefur, eins og gefur að skilja, reynst Palestínufólkinu sem er hér á Íslandi mikil andleg þolraun.

„Þau hafa átt erfitt með svefn og hafa þurft að stóla á svefnlyf. Svo hafa verið börn í aðgerðunum, sex ára, tíu ára og fjórtán ára,“ segir Askur en segir þau tvö yngri hafa farið heim á nóttunni. Ástandið á Gasa taki verulega á þau andlega.