„Það eina sem við getum gert er bara að fylgjast með“

Veðurstofan hefur gefið út nýtt hættumatskort fyrir svæðið í kringum eldgosið. Grindavík hefur verið færð úr „mikilli hættu“ niður í „töluverða hættu.“ Uppfært hættumat Veðurstofunnar tekur gildi klukkan sjö í fyrramálið, fimmtudaginn 21. desember.

Í tilkynningu sem birtist á vef Veðurstofunnar klukkan 17:50 segir að líkur á gosopnun innan svæðis númer 4, þar sem Grindavík er, hafi minnkað. Hættan sé engu að síður talin töluverð.

Síðasta sólarhringinn hafi mesta virknin í eldgosinu haldist um miðbik sprungunnar sem opnaðist í fyrradag. Skjálftavirkni hafi haldist nokkuð stöðug og litlar breytingar orðið á aflögun frá upphafi gossins. Því meti Veðurstofan það svo að líkur á gosopnun í og við Grindavík hafi minnkað.

„Þó svo að dregið hafi úr virkninni frá því að gos hófst, er kraftur gossins núna engu að síður mikill og er sambærilegur við gosin sem urðu við Fagradalsfjall. Það hefur einnig sýnt sig að kvikan getur komist hratt upp á yfirborðið sem gefur ekki mikið ráðrúm til þess að senda út viðvaranir. Taka þarf tillit til þessa þegar kemur að endurskoðun á hættumati. Eins þurfa nokkrir dagar að líða frá því að hraunflæði hættir við gosstöðvarnar og þangað til hægt væri að lýsa yfir goslokum.“

Opið inn í bæinn til fjögur

Í kjölfar uppfærðst hættumats gaf lögreglustjórinn á Suðurnesjum út yfirlýsingu þess efnis að frá og með morgundeginum yrði íbúum Grindavíkur og þeim sem þar starfa heimilt að dvelja í bænum frá klukkan sjö að morgni til klukkan fjögur síðdegis.

„Ekki er talið öruggt að dvelja í Grindavík að næturlagi. Gert er ráð fyrir því að íbúar og starfsmenn yfirgefi bæinn eftir kl. 16. Fjölmiðlar hafa aðgang að bænum á sama tíma. Íbúum og starfsmönnum fyrirtækja verður ekki fylgt inn í bæinn en viðbragðsaðilar verða til staðar. Óviðkomandi er bannaður aðgangur. Eftirlit verður haft með þeim bílum sem fara inn og út úr bænum,“ segir í tilkynningunni.

Þá segir að ef til rýmingar bæjarins komi muni viðbragðsaðilar gefa hana til kynna með hljóðmerkjum og ljósum. Akstursleiðir út úr bænum séu eftir Nesvegi, Suðurstrandarvegi og eftir atvikum Grindavíkurvegi. 

Virknin minni en hættan enn til staðar

Sigríður Kristjándsdóttir, náttúruvársérfræðingur hjá Veðurstofunni, segir hættuna á fyrirvaralausri gosopnun í Grindavík enn til staðar. Hún sé þó minni en áður var talið.

„Við sjáum það bara að virknin í gosinu sjálfu hefur verið minni í dag, jarðskjálftavirknin hefur minnkað og aflögunarmerki eru minni. Þá höldum við að það séu minni líkur á að það opnist en það er enn hætta til staðar,“ sagði Sigríður í beinni útsendingu í kvöldfréttum Stöðvar 2.

En hvað gefur tilefni til að endurskoða hættumatskortið svona snemma?

„Við sjáum það bara að virknin hún minnkaði mjög hratt, bæði í gígnum og líka skjálftavirknin. Að sama skapi gerðist þetta allt mjög hratt á mánudagskvöldið. Þannig að hættan er enn mikil og það getur allt gerst svolítið hratt.“

Bara hægt að fylgjast með

Hún segir það hafa verið áskorun að fylgjast með virkni gossins í dag, vegna veðurskilyrða. Sérfræðingar Veðurstofunnar styðjist mikið við vefmyndavélar og skyggni hafi verið lélegt.

„En það virtist sem virknin væri nokkuð stöðug, aðallega í einum gígn, beint austur af Sýlingarfellinu.“

Hún segir erfitt að segja til um framhaldið.

„Ég vildi óska að við gætum það en það er mjög erfitt. Það eina sem við getum gert er bara að fylgjast með og vera á tánum.“