Erlent

Þúsundir flýja um­kringd sjúkra­hús

Samúel Karl Ólason skrifar
Ísraelskur hermaður á Gasaströndinni.
Ísraelskur hermaður á Gasaströndinni. Ísraelski herinn

Harðir bardagar við sjúkrahús í norðurhluta Gasastrandarinnar hafa þvingað þúsundir Pelstínumanna til að flýja síðustu skjól svæðisins. Hundruð eru enn fastir á sjúkrahúsunum en þar á meðal eru sjúklingar í alvarlegri stöðu og nýfædd börn en birgðir eru að klárast og ljósavélar eldsneytislausar.

Al-Shifa sjúkrahúsið, það stærsta á Gasaströndinni, hefur verið umkringt en forsvarsmenn ísraelska hersins segja að höfuðstöðvar Hamas megi finna í göngum undir sjúkrahúsinu.

Aðstæður á sjúkrahúsinu og öðrum eru sagðar hræðilegar en það sama er upp á teningnum á Al-Quds sjúkrahúsinu, sem einnig er í Gasaborg en því hefur verið lokað og er unnið að því að flytja um sex þúsund manns, sjúklinga, starfsmenn og fólks sem hefur leitað sér skjóls þar á brott, samkvæmt frétt AP fréttaveitunnar.

Sjá einnig: Segir al Shifa orðið vettvang dauða, eyðileggingar og örvæntingar

Gasaströndin er eitt þéttbýlasta svæði heimsins en þar búa um 2,3 milljónir manna á svæði sem er gróflega 40 kílómetra langt og tíu kílómetra breitt. Um tveir þriðju íbúa eru taldir hafa þurft að flýja heimili sín vegna gífurlega umfangsmikilla árása Ísraela á svæðið undanfarinn mánuð.

Fyrirburar á Al-Shifa sjúkrahúsinu í Gasaborg. Sjúkrahúsið er umkringt hermönnum, rafmagnslaust og birgðir að klárast.AP/Dr. Marawan Abu Saada

Forsvarsmenn ísraelska hersins hafa beðið borgara um að flýja til suðurs, þar sem norðurhluti Gasastrandarinnar hefur verið einangraður frá þeim syðri. Ísraelar hafa þó einnig verið að mannskæðar loftárásir á suðurhlutanum.

Heilbrigðisráðuneyti Gasa, sem stýrt er af Hamas, segir rúmlega ellefu þúsund manns hafa fallið í árásum Ísraela. Um 2.700 er saknað.

Fordæma Hamas-liða

Utanríkisráðherrar Evrópusambandsins sendu í gær frá sér yfirlýsingu þar sem þeir kölluðu eftir vopnahléi svo hægt væri að koma birgðum til íbúa á Gasaströndinni. Ráðherrarnir kölluðu einnig eftir því að Hamas-liðar slepptu þeim um 240 gíslum sem vígamenn samtakanna tóku í síðasta mánuði og leyfðu óbreyttum borgurum að yfirgefa átakasvæðið.

Ráðherrarnir fordæmdu einnig Hamas-liða fyrir að skýla sér bakvið sjúkrahús og óbreytta borgara.

Ísraelski herinn birti í morgun myndband frá Al-Quds sjúkrahúsinu en það er sagt sýna Hamas-liða skjóta á ísraelska hermenn frá sjúkrahúsinu. Hermenn eru sagðir hafa fellt 21 vígamann en því er einnig haldið fram, samkvæmt ísraelskum blaðamanni, að vígamenn hafi laumað sér meðal flýjandi borgara, til að ráðast á ísraelska hermenn.

Átök í Ísrael og Palestínu Ísrael Palestína Hernaður Evrópusambandið

Tengdar fréttir

Varpa enn sprengjum á byltingarverði í Sýrlandi

Bandaríkjamenn gerðu í gærkvöldi aftur loftárásir gegn Írönum og vígahópum sem þeir styðja í Sýrlandi. Sprengjum var varpað á vopnageymslu byltingarvarða Írans og á þjálfunarmiðstöð í austurhluta landsins en þetta er í þriðja sinn á rúmum tveimur vikum sem Bandaríkjamenn gera slíkar árásir.

Flytja nýbura af spítalanum sem enn er án rafmagns

Starfsfólk á stærsta spítala Gasa, al-Shifa, segja sjúklinga og fólk á flótta fast í hræðilegu ástandi á meðan átök fara fram í nærliggjandi götum. Ísraelsher segist ætla að aðstoða við flutning nýbura af spítalanum í dag. Átök hafa geisað við spítalann í tvo daga. 

Spítalinn rafmagnslaus og án matar og vatns

Al-Shifa spítalinn á Gasa er nú án rafmagns, matar og vatns. Forseti Frakklands, Emmanuel Macron, segir að Ísrael verði að hætta að sprengja börn í loft upp. 

Ekkert bendir til að blaðamenn á Gasa hafi vitað af árásunum

Framkvæmdastjóri HonestReporting segir samtökin aðeins hafa verið að velta upp spurningum þegar þau ýjuðu að því að palestínskir blaðaljósmyndarar hafi vitað af árás Hamas á Ísrael þann 7. október fyrir fram. Ekkert bendi til að ljósmyndararnir hafi vitað af árásinni fyrirfram. 

Mest lesið


Fleiri fréttir

Sjá meira


×

Mest lesið