Leita byssumanns eftir skot­á­rás í Úlfarsárdal

Fram kemur í tilkynningu frá lögreglunni á höfuðborgarsvæðinu að tilkynning hafi borist um málið klukkan 04:54 í nótt. Grímur Grímsson, yfirlögregluþjónn sem stýrir rannsókn málsins, segir árásina hafa átt sér stað utanhúss. Samkvæmt heimildum fréttastofu var árásin fyrir utan fjölbýlishús við Silfratjörn í austurhluta Úlfarsárdals.

„Þar var skotið á karlmann við hús í hverfinu og var hann fluttur á Landspítalann til aðhlynningar. Líðan mannsins er eftir atvikum, en hann er ekki í lífshættu. Árásarmaðurinn fór af vettvangi og er hans leitað,“ segir í tilkynningu lögreglu.

Grímur segir líðan mannsins góða eftir atvikum. Lögregla leiti allra leiða til að hafa uppi á þeim sem þarna komu við sögu.

Nokkrum skotum var hleypt af

Rannsóknin er sögð á frumstigi og því ekki með öllu ljóst hvað hafi búið að baki árásinni. Grunur er um að hún tengist útistöðum tveggja hópa. Grímur segir ekki mikla áhættu fyrir almenning vegna þess að átökin tengist útistöðum hópanna.

„Fyrir liggur að nokkrum skotum var hleypt af á vettvangi og hafnaði eitt þeirra í manninum eins og áður sagði. Annað skot hafnaði enn fremur í íbúð fólks, sem er með öllu ótengt málinu.“

Vegna málsins biðlar lögregla til bæði íbúa og forráðamanna fyrirtækja í Úlfarsárdal og Grafarholti að athuga með myndefni í öryggis- og eftirlitsmyndavélum á svæðinu og koma því til lögreglu ef svo ber undir.

„Um er að ræða tímann frá miðnætti í gærkvöld og til klukkan sjö i morgun, en í þágu rannsóknarinnar er verið að leita upplýsinga um grunsamlegar mannaferðir. Lögreglan á höfuðborgarsvæðinu og embætti ríkislögreglustjóra eru með mikinn viðbúnað vegna málsins.“

Kennarar hvattir til að hlúa að börnum

Tölvupóstur var sendur í morgun á starfsfólk í Dalskóla í Úlfarsárdal vegna árásarinnar og hefur fréttastofa póstinn undir höndum. Þar segir að árásin hafi átt sér stað í fjölbýlishúsi.

„Elsku starfsfólk. Í morgun varð skotárás í einni af blokkinni í hverfinu. Mörg börn vöknuðu upp við skothvelli, sáu sjúkrabíla, löggubíla og blóð á vettvangi,“ segir í tölvupóstinum.

„Börnin eru mörg hver í uppnámi og ræða þennan atburð sín á milli. Nokkur hafa talað um að sá sem var skotinn væri dáinn. Við þurfum að hlúa vel að börnunum og ef barn er mjög óttaslegið hafið þá samband heim og látið vita.“

Samkvæmt heimildum fréttastofu mátti sjá blóðför bæði innanhúss og utan í morgun. Dæmi eru um að börn hafi vaknað við lætin í nótt og vakið foreldra sína. Einn íbúi hússins sá tvo unga karlmenn á nærfötum utandyra á meðan einn var fluttur um borð í sjúkrabíl.

Tilkynning lögreglu klukkan 11:37

Fréttin var uppfærð með tilkynningu lögreglu.