„Ömur­legt að fylgjast með al­þjóða­sam­fé­laginu bregðast Ísraels­mönnum“

Ísland sat hjá í atkvæðagreiðslu um tillögu Jórdaníu um vopnahlé á Gasa á allsherjarþingi Sameinuðu þjóðanna á föstudag. 120 lönd greiddu atkvæði með, 45 sátu hjá og 14 voru á móti. Noregur var eitt Norðurlanda sem greiddi atkvæði með tillögunni og sagði forsætisráðherra landsins í dag að Ísraelar hafi gengið of langt. Hjáseta íslenskra stjórnvalda hefur verið gagnrýnd, meðal annars af ríkisstjórnarflokki Vinstri grænna, en Diljá Mist segir afstöðuna eðlilega.

Því miður hafi ekki náðst samstaða

„Tillagan sem er lögð fram af Jórdaníu fyrir hönd Araba-hópsins, hún gekk ekki nógu langt varðandi það að fordæma árás Hamas og sömuleiðis að ávarpa þessa hræðilegu gíslatöku. Þess vegna studdu um níutíu ríki, og þar af allar okkar vina- og nágrannaþjóðir, breytingartillögu sem innibar þá þessi mikilvægu skilaboð sömuleiðis: annars vegar um hryðjuverkin og gíslatökuna og hins vegar um tafarlaust mannúðarhlé til þess að það væri hægt að koma að mannúðaraðstoð,“ segir Diljá Mist. 

Hún segir miður að breytingartillagan, sem Kanadamenn lögðu fram og meðal annars Bandaríkjamenn, sem studdu ekki upphaflegu tillöguna, greiddu atkvæði með, hafi ekki náð fram að ganga. Í stuttu máli var meiri áhersla lögð á fordæmingu á hryðjuverkum Hamas í breytingartillögu Kanada. Bandaríkjamenn greiddu til að mynda atkvæði móti upphaflegri tillögu Jórdaníu, sem 120 ríki samþykktu. Eins og fyrr segir sat Ísland hjá.

Skjóti ekki skökku við

„Þess vegna studdu um níutíu ríki, og þar af allar okkar vina- og nágrannaþjóðir, breytingartillögu sem innibar þá þessi mikilvægu skilaboð sömuleiðis: annars vegar um hryðjuverkin og gíslatökuna og hins vegar um tafarlaust mannúðarhlé til þess að það væri hægt að koma að mannúðaraðstoð. Sú breytingartillaga var ekki samþykkt og þar voru auðvitað dregnar skýrar línur.“

„Það er auðvitað ömurlegt til þess að hugsa að það sé ekki hægt að koma sér saman um það á þessum vettvangi; að fordæma hryðjuverk Hamas. Þess vegna kom til þess að tillagan var borin undir atkvæði óbreytt og þá ákvað sendinefnd Íslands, ásamt fjölmörgum vina- og nágrannaþjóðum, að sitja hjá en skýra jafnframt frá því í atkvæðagreiðslu að ítreka auðvitað ákall um vopnahlé og um tafarlausa mannúðaraðstoð,“ segir Diljá Mist enn fremur.

Hún segir afstaða Íslands alls ekki skjóta skökku við: „Þetta er í fullu samræmi við okkar yfirlýsingar og okkar stefnu. Annars vegar um að fordæma harkalega þessi hræðilegu hryðjuverk Hamas og hins vegar um að kalla eftir tafarlausu vopnahléi til þess að það sé hægt að koma að mannúðaraðstoð.“

Merki um að Ísraelar gangi of langt

Diljá Mist segir margt benda til þess að Ísraelar gangi of langt í gagnárásum, eins og hafi svo oft gerst, eftir hryðjuverk Hamas-liða og af hálfu annarra hryðjuverkasamtaka af sama meiði, sem framin hafi verið reglubundið í fimmtíu ár.

„Þá höfum við séð harkalegar og allt of harkalegar gagnaðgerðir og við höfum ekki legið á skoðunum okkar varðandi það og komið þeim skilaboðum á framfæri víða, meðal annars undanfarna daga og vikur. En það dregur ekki úr þeim skilaboðum, þeim mikilvægu skilaboðum, að við fordæmum að sjálfsögðu hryðjuverk Hamas og það er ömurlegt að fylgjast með alþjóðasamfélaginu bregðast Ísraelsmönnum með þessum hætti,“ segir Diljá Mist að lokum.