Dóms­mála­ráð­herra Belgíu segir af sér vegna skot­á­rásarinnar

„Þetta eru risastór og óviðunandi mistök með hræðilegum afleiðingum og þau skrifast á mig. Dómari fylgdi gerðinni ekki eftir og málið var ekki afgreitt sem skyldi. Ég er ekki að reyna að afsaka mig með neinum hætti en ég held að mér beri skylda til að segja af mér,“ sagði Vincent Van Quickenborne dómsmálaráðherra þegar hann tilkynnti afsögn sína í gær.

Árásarmaðurinn var 45 ára gamall Túnisbúi sem dvaldi ólöglega í Belgíu. Hann mun hafa verið þekktur hjá lögreglu grunaður um ýmsa glæpi og mansal. Yfirvöld í Túnis höfðu gefið út handtökuskipun og óskuðu eftir framsali mannsins í fyrra. Belgísk yfirvöld sinntu ekki boðunum og segist dómsmálaráðherra bera á því ábyrgð. Deutsche Welle greinir frá.

Eins og fyrr segir létu tveir Svíar, fótboltaaðdáendur, lífið í árásinni og einn særðist til viðbótar. Hinir látnu voru eldri karlmenn, annar á sjötugsaldri og hinn á áttræðisaldri. Annar þeirra var búsettur í Stokkhólmi en hinn bjó erlendis.

Árásarmaðurinn hafði áður búið í Svíþjóð og meðal annars setið þar í fangelsi. Hann hafði meðal annars sótt um hæli í Noregi, Svíþjóð, Ítalíu og Belgíu en Belgar höfnuðu honum árið 2021 og átti hann því að hafa farið úr landi.