Leikmenn sem svöruðu fyrir sig í sumar

Árni Snær Ólafsson

Síðustu ár höfðu verið erfið fyrir Árna Snæ í markinu hjá ÍA. Hann missti sætið sitt í byrjunarliðinu þegar Skagamenn björguðu sér á ævintýralegan hátt og komust í bikarúrslit 2021 og í fyrra féll liðið. Árni Snær fór í kjölfarið til Stjörnunnar þar sem hann fyllti skarð Haraldar Björnssonar sem var meiddur allt tímabilið. Árni Snær átti líklega sitt besta sumar á ferlinum í ár. Hann hélt tíu sinnum hreinu og ekkert liðið fékk á sig færri mörk í deildinni en Stjarnan (29). Í 21 leik undir stjórn Jökuls Elísabetarsonar fengu Stjörnumenn aðeins fimmtán mörk á sig.

Kjartan Henry Finnbogason

Kjartan Henry var mikið fréttum á síðasta tímabili en fæstar þeirra sneru að því sem hann gerði inni á vellinum. Enda var hann lítið þar seinni hluta tímabilsins og endaði á því að yfirgefa KR á nokkuð dramatískan hátt. Kjartan Henry gekk í raðir FH í vetur og endaði á því að vera einn af sigurvegurum fótboltasumarsins 2023. Hann skoraði ellefu mörk í Bestu deildinni en aðeins fjórir leikmenn skoruðu meira. Fjögur markanna komu gegn KR, þar af tvö í lokaleik tímabilsins, sem honum hefur væntanlega ekkert leiðst. 

Davíð Örn Atlason

Lukkan hefur ekki beint verið í liði með Davíð undanfarin ár. Hann fór til Breiðabliks frá Víkingi 2021 en Víkingar urðu þá tvöfaldir meistarar. Hann gekk í raðir Víkings í fyrra en þá urðu Blikar Íslandsmeistarar. Til að bæta gráu ofan á svart voru tækifæri Davíðs af skornum skammti á síðasta tímabili. Í sumar snerist dæmið við. Davíð var byrjunarliðsmaður hjá Víkingum sem urðu Íslands- og bikarmeistarar og stimpluðu sig inn sem eitt besta lið Íslandssögunnar. Davíð lék 22 af 27 deildarleikjum Víkings og alla fimm bikarleikina og átti stórgott tímabil.

Atli Hrafn Andrason

HK ákvað að veðja á Atla Hrafn þrátt fyrir að hann hafi látið lítið að sér kveða síðustu ár. Tímabilin 2021 og 2022 lék hann til að mynda samtals 39 deildarleiki með ÍBV en skoraði aðeins eitt mark. Atli Hrafn átti hins vegar mjög fínt tímabil með HK í sumar og var besti leikmaður liðsins ásamt Örvari Eggertssyni og Arnþóri Ara Atlasyni. Atli Hrafn var notaður sem kantmaður og fremsti miðjumaður en bestu leikina spilaði hann í stöðu framherja, eins konar platníu (e. false nine). Atli Hrafn lék 26 af 27 deildarleikjum HK og skoraði fjögur mörk.

Elfar Freyr Helgason

Elfar missti af öllu tímabilinu 2021 vegna meiðsla og spilaði aðeins 156 mínútur í Bestu deildinni í fyrra. Þrátt fyrir það sótti Arnar Grétarsson Elfar til Vals í vetur enda þekkjast þeir vel frá tíma Arnars í Breiðabliki. Elfar fór strax í stórt hlutverk hjá Val. Liðið fékk aðeins eitt mark á sig í Lengjubikarnum og þótt Valsvörnin hafi ekki verið jafn sterk þegar út í alvöruna var komið var hún mun betri með Elfar en án hans. Í þeim nítján deildarleikjum sem Elfar byrjaði inn á í sumar fékk Valur á sig tuttugu mörk. Í hinum átta leikjunum fékk liðið á sig fimmtán mörk.