Þreyttir eftir harða bardaga: „Vinir okkar týna lífinu í skóginum, einn af öðrum“

Blaðamaður AP fréttaveitunnar ræddi við hermenn 3. árásarherdeildar um orrustuna um Andrjívka og Klistjívka en þeir höfðu það verkefni að taka fyrrnefnda bæinn. Eins og áður segir tók það þrjá mánuði og kostaði það stórfylkið mikið.

„Vinir okkar týna lífinu í skóginum, einn af öðrum,“ sagði einn hermannanna. 

„Þegar ég hugsa um hversu langt við eigum eftir sækja fram ... líklega mun ég einhvern daginn vera sá sem liggur eftir í skóginum.“

Rússar tóku rústir Bakhmut í maí en það voru að mestu málaliðar Wagner og rússneskir fangar sem börðust við Úkraínumenn í borginni. Síðan þá hefur úkraínski herinn staðið í sóknum norður og suður af borginni, með því markmiði að umkringja hana og frelsa á nýjan leik.

3. árásarherdeildin inniheldur eingöngu sjálfboðaliða og er talinn eitt af bestu og reynslumestu stórfylkjum Úkraínu. Þeir hafa barist við Bakhmut í austurhluta Úkraínu nánast án hvíldar frá því í janúar en nýrri og reynsluminni herdeildir berjast í suðurhluta landsins og notast við hergögn frá Vesturlöndum.

Meðlimir 3. árásarherdeildarinnar notast við gamlan búnað frá tímum Sovétríkjanna og hefur hægt á sókn þeirra undanfarinn mánuð. Forsvarsmenn hersins lýstu þó yfir miklum árangri í vikunni þegar Andrjívka og Klistjívka voru frelsaðir.

Myndbandið hér að neðan sýnir aðstæður í Andrjívka á dögunum.

Þann 14. september brutu hermenn sér leið í gengum varnir Rússa við bæinn eftir að hafa látið sprengjum rigna á svæðið. Hermenn ruddust að bænum á meðan rússneskir hermenn flúðu en rússneskt stórskotalið varpaði sprengjum á eigin hermenn á flótta og hermenn sem gáfust í bænum.

Þá fóru úkraínskir hermenn hús úr húsi og handsömuðu rússneska hermenn sem gáfust upp. Aðra felldu þeir og kepptust þeir við að skjóta niður rússneska dróna sem notaðir voru til að varpa handsprengjum á þá.

Rússneskir herbloggarar hafa einnig sagt frá því að rússneskir hermenn hafi fallið fyrir eigin stórskotaliði og myndbönd hafa sýnt það þegar rússneskt stórskotalið skaut á Andrjívka þegar úkraínskir hermenn voru að handsama rússneska hermenn.

Fram hefur komið í rússneskum fjölmiðlum að Andrei Kondrashkin, ofursti og yfirmaður 31. stórfylkis fallhlífarhermanna Rússa, hafi fallið í átökunum.

Sækja fram á bryndrekum

Í greininni hér að ofan kom einnig fram að Úkraínumenn hafi verið að víkka holuna sem þeir hafa grafið í varnir Rússa í suðurhluta Úkraínu í sumar. Í gær gerðist það í fyrsta sinn en myndefni sýndi Úkraínumenn á bryndrekum fyrir innan stærstu varnarlínu Rússa, nærri bænum Verbove í Saporisjía-héraði.

Drónamyndband sem Rússar tóku sýnir Úkraínumenn sækja að þorpinu á Marder-bryndrekum frá Þýskalandi og Stryker-brynvörðum bílum, frá Bandaríkjunum. Þessi farartæki eru þarna komin í fyrsta sinn yfir skriðdrekaskurðinn og drekatennurnar svokölluðu í suðurhluta landsins.

Rússar segjast hafa skemmt nokkur af þessum farartækjum í stórskotaliðsárásum.

Hér að neðan má sjá tvö myndbönd frá svæðinu við Verbove. Efra myndbandið sýnir úkraínska fótgönguliða sækja að skotgröf Rússa, sem nýverið er búið að gera stórskotaliðsárás á. Neðra myndbandið sýnir áðurnefnd farartæki við Verbove.

Bandaríska hugveitan Instititue for the study of war segir að of snemmt sé að segja að Úkraínumenn hafi rofið varnir Rússa á svæðinu. Það að Úkraínumenn hafi getað fært bryndreka og brynvarða bíla svo framarlega, gefi þó til kynna að gagnsókn Úkraínumanna hafi náð árangri.

Þá gefi það einnig til kynna að Úkraínumenn hafi tryggt sér yfirburði þegar kemur að stórskotaliði á svæðinu. Þetta séu skref sem gætu verið undanfari stærri framsóknar, en of snemmt sé að segja til um það.