Fálkaorðuhafi setur sjarmerandi íbúð á sölu

Um er að ræða 146,5 fermetra hæð og ris í tvíbýlishúsi við Guðrúnargötu 10 sem hefur fengið töluverðar endurbætur. Húsið var byggt árið 1946 og er búið þeim tíðaranda þar sem sjarmerandi skrautlistar í lofti og útskotinn gluggi í stofu fá að njóta sín.

Eignin er búin þremur svefnherbergjum og tveimur björtum stofum sem hægt er að loka á milli með rennihurð. Úr eldhúsi er gengið upp stiga á rúmgott ris þar sem útgegnt er á hellulagðar svalir með útsýni yfir Miklatún og að Öskjuhlíð.

Á fasteignavef Vísis kemur fram að rúmgott herbergi í kjallara fylgi eigninni sem tilvalið væri til útleigu.

Kristinn starfar sem skólastjóri og kennari hjá Allegro Suzukitónlistarskólanum. Þau Lilja reka skólann saman þar sem Lilja kennir á fiðlu. Hún hlaut fálkaorðuna í sumar fyrir framlag hennar til tónlistaruppeldis og menntunar.