Erlingur leik­stýrði Juli­an Sands í hans síðustu mynd

„Hann var búinn að vera að leika í rúm fjörutíu ár og ég hafði verið aðdáandi hans síðan ég var krakki og sagði honum fyrst þegar við hittumst að Arachnophobia væri ein af mínum allra uppáhalds myndum,“ segir Erlingur í samtali við Vísi. Í þeirri mynd lék Sands á móti stórstjörnum líkt og Jeff Daniels og John Goodman í hryllingsmynd um smábæ sem verður undirlagður af kóngulóm.

Sands sá eini sem kom til greina

„Þegar mér datt í hug að heyra í honum og fá hann til þess að leika í The Piper þá var ég eiginlega alveg viss um að hann myndi segja nei. En ég vildi taka sjénsinn ef það skyldi nú vera að hann myndi hafa áhuga á að hitta mig og jafnvel lesa handritið og það gekk eftir.“

The Piper fjallar um tónskáld sem tekur að sér að ljúka við að semja sinfoníu læriföður síns sem er allur. Hún kemst fljótt að því að eitthvað dularfullt er á seyði þegar hún grípur í tónverk læriföðursins sem magnar upp ófyrirséða illsku. Myndin hefur enn ekki fengið útgáfudag.

Julian Sands fer með hlutverk hljómsveitarstjórans í myndinni og Erlingur segir hann hafa verið fullkomin í það hlutverk. Sands á enda að baki langan feril þegar kemur að hryllingsmyndum og hefur leikið í mörgum af uppáhalds myndum Erlings.

„Mig vantaði mann sem var með þetta, hvernig lýsir maður því, þessa listrænu ástríðu og passar því í þennan heim en er á sama tíma með þennan ákveðna ofsa en gat á sama tíma verið illur og gat farið með þetta alla leið. Julian Sands var fullkominn í þetta.“

Elskaði söguna

Leikarinn hafi átt ótrúlega auðvelt með að setja sig í hlutverk sitt. Erlingur segir samstarfið hafa gengið vonum framar og þeir hafi fljótt tengst miklum vináttuböndum.

„Hann er sjálfur hryllingsmyndaaðdándi og kunni ótrúlega mikið að meta söguna sem við segjum í myndinni. Samstarfið hefði því ekki getað gengið betur. Hann var svona mesti reynsluboltinn á sviðinu og elstur þannig að hann setti tóninn á settinu og við öll höfðum ótrúlega gaman af því að vinna með honum og spjalla við hann.“

Fjallgöngur hans ástríða

Leikarinn hafi verið örlátur á tíma sinn, jarðbundinn og manneskjulegur. Hann og Erlingur héldu sambandi að tökum loknum sem fóru fram í Búlgaríu og segir Erlingur fréttir af því þegar leikarinn týndist eftir að hafa gengið á Mount Baldy fjallið í Kaliforníu í janúar eðli málsins samkvæmt hafa verið mikið áfall. Mildi sé að lík hans hafi fundist svo fjölskylda og vinir geti syrgt hann.

„Það er ótrúlega sorglegt að þetta hafi endað svona,Fjallgöngur voru hans mesta ástríða á eftir leiklistinni og hann var mikill fjallgöngumaður. Hann hafði oft gengið þarna í Kaliforníu og það fyrsta sem hann gerði þegar við mættum til Búlgaríu við tökur á sínum tíma var einmitt að ganga upp á topp á fjallinu sem var fyrir ofan stúdíóið. Þetta var hans ástríða.“

Alveg að klára Kulda

Erlingur segir ekki alveg víst hvenær The Piper muni koma út en önnur mynd hans, Kuldi, sem byggð er á samnefndri bók Yrsu Sigurðardóttur, kemur út í september næstkomandi. Erlingur var staddur í Belgíu að leggja lokahönd á myndina í eftirvinnslu þegar Vísir ræddi við hann.

„Þetta hefur verið ótrúlega taugatrekkjandi vika og síðasta verkefnið er alltaf það sem tekur lengstan tíma. Ég er auðvitað bara fyrst og fremst spenntur yfir því að fá að frumsýna Kulda,“ segir Erlingur en sex ár eru frá því að síðasta bók eftir Yrsu var kvikmynduð þegar Ég man þig í leikstjórn Óskars Þórs Axelssonar kom út.

Erlingur viðurkennir að því fylgi ákveðin pressa að fylgja eftir bók Yrsu. „Hún er auðvitað glæpasagnadrottning Íslands og maður vill gera hennar efni góð skil og vill ekki að aðdáendur hennar verði sviknir. Ég held að miðað við viðtökur þeirra sem hafa séð myndina að þá þurfi ég ekki að hafa miklar áhyggjur,“ segir Erlingur hlæjandi.

„Vonandi verð ég eins áhyggjulaus eftir mánuð. Ég er að minnsta kosti mjög stoltur af því sem við höfum gert saman og hlakka til þess þegar fleiri fá að sjá myndina.“