Hótel­smíði í upp­námi vegna ná­granna­deilu um vega­gerð

Fjallað var um málið í fréttum Stöðvar 2 en Orustustaðir eru skammt frá hringveginum um Suðausturland, um sjö kílómetra neðan við Orustuhól. 

Eigandinn Hreiðar Hermannsson hefur undirbúið verkefnið í meira en áratug, er búinn að reisa starfsmannaaðstöðu og kominn með 28 hótelíbúðir í útleigu á bráðabirgðaleyfi.

„Þetta verkefni stendur í einhverjum tveimur milljörðum í mati í dag, eins og það er komið með öllu. Því að það er ekki bara þetta sem þið sjáið heldur allt það sem er búið að festa sig í kaupum. Ég er að fá steypustöð, ég er að fá allt milli himins og jarðar,“ segir Hreiðar, sem jafnframt á Stracta-hótel á Hellu.

Stóra verkefnið er hótelbygging sem búið er að hanna fyrir fjögurhundruð gesti, með margskyns afþreyingu. Þetta yrði stærsti vinnustaður Skaftárhrepps með milli áttatíu og níutíu starfsmenn.

„Hótelið er, fyrsti áfangi, hann er sjöþúsund fermetrar. Og heildarfjárfestingin er tíu milljarðar,“ segir Hreiðar.

Vegurinn að Orustustöðum liggur að hluta um sameiginlegt land Hraunbóls og ríkisjarðarinnar Sléttabóls, sem báðar eru eyðibýli. Eigendur Hraunbóls, sem nýta hana sem orlofsjörð, kæra sig ekki um að umferðin fari þar í gegn.

„Þetta er í rauninni réttur okkar sem landeigendur að utanaðkomandi menn komi ekki og leggi veg í gegnum okkar land,“ segir Þuríður Helga Benediktsdóttir, einn eigenda Hraunbóls.

„Þessi vegur, hann er búinn að vera hérna í tvöhundruð og eitthvað ár,“ segir Hreiðar en hann hóf sjálfur lagfæringu á veginum.

„Þá hóf Hreiðar upp á eigin spýtur sínar framkvæmdir. Hann tók eiginlega í nefið einkaslóða í okkar landi og hann hefur svoleiðis valtað gjörsamlega yfir okkur,“ segir Þuríður.

„Ég hef byggt veginn og sett ný gólf í brýrnar og gert það svona allt bara ágætt,“ segir Hreiðar.

Eigendur Hraunbóls brugðust við með því að loka veginum.

„Fólk hefur verið lokað hérna inni og lagt bílum á veginn. Fólk hefur ekki komist í búðir og allt þar á milli. Og það eru til myndir af lögreglu hérna þar sem þeir eru að koma ferð númer tvö utan úr Vík,“ segir Hreiðar.

„Í þessum framkvæmdum sínum þá beitir hann sínum mönnum og sínum vélum og það endaði í rauninni með því í sumar að við urðum að kæra fyrir líkamsárás, einn af hans starfsmönnum.

Eftir það ákváðum við að hér skal látið stopp vera og fara bara dómstólaleiðina,“ segir Þuríður.

„Yfirgangur er náttúrlega að loka löglegum leiðum. Það er yfirgangur. En ég hef engan áhuga á því að vaða yfir menn. Ég hef aldrei gert neitt á þeirra hlut,“ segir Hreiðar.

Fyrr í mánuðinum hafði Hreiðar betur þegar beiðni um lögbann á notkun vegarins var hafnað.

„Er þetta bara íslenska samfélagið í hnotskurn? Freki karlinn og peningarnir, þeir ganga upp?“ spyr Þuríður.

„Lögmenn frá mér og þeim hafa eitthvað verið að tala saman. En það virðist ekki ganga, því miður,“ segir Hreiðar.

Án uppbyggðs vegar fær svo stórt hótel vart starfsleyfi.

-Er engin sáttaleið?

„Nei, hann er búinn að ganga það gjörsamlega yfir okkur að það verður ekki í boði,“ svarar Þuríður Helga.

Fjallað var um upphaf framkvæmdanna fyrir þremur árum í frétt Stöðvar 2, sem sjá má hér: