Á­nægður með sigurinn en mjög flatur leikur

„Ég er auðvitað mjög ánægður með sigurinn en þetta var frekar flatur leikur og mikið um þreytu í mínu liði,“ byrjaði Arnar Gunnlaugsson að segja.

„Við náðum svona ágætis kafla í fyrri hálfleik þar sem við kláruðum þetta í rauninni. En eins og ég segi þá fannst mér vera þreyta í mínum leikmönnum og mér finnst leikjaálagið hafa náð til okkar. Við erum búnir að spila mikið af leikjum og mikið af spennuþrungnum leikjum og síðan hefur líka verið stutt á milli leikja sem hefur ekki hjálpað,“ hélt Arnar áfram að segja.

„Við vorum eiginlega alveg búnir á því í seinni hálfleiknum en við vissum að það var ekki okkar að sækja eitt né neitt og því vorum við meira í því að spila þéttan varnarleik og reyna að ná upp einhverjum skyndisóknum en það sást vel að það var klárlega enginn ferskleiki ennþá í fótunum á mínum mönnum.“

Arnar talaði um það að hann ætlaði að gefa sínum leikmönnum gott frí vegna landsleikjanna.

„Já það er klárt mál, þeir fá fimm daga frí núna til þess endurhlaða batteríin en síðan tekur við önnur svona törn eftir landsleikina því þá fara Evrópuleikirnir að byrja og síðan undanúrslitin í bikarnum þannig þetta verður mikil keyrsla,“ endaði Arnar Gunnlaugsson að segja eftir leik.