Yfirmaður Grétars í langt bann frá öllum fótbolta en átti að finna arftaka Conte

Enskir fjölmiðlar greina frá því að staða Paratici, sem er nánasti yfirmaður Grétars Rafns Steinssonar, sé í algjörri óvissu hjá Tottenham eftir að FIFA tilkynnti í dag að beiðni ítalska knattspyrnusambandsins um útvíkkun bannsins hefði verið samþykkt.

Paratici var dæmdur í 30 mánaða bann frá fótbolta vegna sinnar þátttöku í því að falsa bókhald Juventus, sem í vetur leiddi til þess að fimmtán stig voru dregin af Juventus í ítölsku A-deildinni.

Paratici fékk þyngstu refsinguna af þeim tólf einstaklingum sem var refsað vegna málsins en upphaflega átti bann þeirra frá fótbolta aðeins að gilda á Ítalíu. FIFA hefur hins vegar breytt því.

Þessum fregnum er líst sem miklu áfalli fyrir Tottenham í Daily Mail þar sem segir að Paratici hafi átt að fara fyrir leitinni að nýjum knattspyrnustjóra í stað Antonio Conte sem nú hefur kvatt félagið.

Samkvæmt Sky Sports má Paratici núna ekki taka neinn þátt í viðskiptum með leikmenn. Hann má ekki tala við umboðsmenn eða gera samninga, sem er stór hluti af hans starfslýsingu sem yfirmaður knattspyrnumála, en má starfa innan Tottenham og mæta þar á fundi. Beðið er viðbragða frá Tottenham við tíðindum dagsins.

Í gær var viðtal við Paratici birt á heimasíðu Tottenham þar sem hann sagði félagið vera einbeitt í því að stefna fram á við eftir brotthvarf Conte sem hafði stýrt liðinu í 16 mánuði. Cristian Stellini mun stýra Tottenham til loka leiktíðarinnar með aðstoð Ryan Mason.

Paratici, sem er fimmtugur, starfaði í ellefu ár hjá Juventus og þar af þrjú ár sem yfirmaður knattspyrnumála á árunum 2018-2021, áður en hann kom til Tottenham.

Paratici og Juventus hafa áfrýjað úrskurði ítalska knattspyrnusambandsins og til stendur að málið verði tekið fyrir hjá ítölsku ólympíunefndinni 19. apríl.