Ragnar: Þegar Hafdís mætir fara bara allir aftast í röðina

„Leikurinn var bara hræðilega illa spilaður og frammistaðan hjá okkur er bara ömurleg. Bara til skammar. Við getum svosem sagt að við höfum spilað á köflum ágætis vörn á móti sumum leikmönnum. Við látum Heklu Rún [Ámundardóttur] fara rosalega illa með okkur.“

„Það er verið að mæta henni eins og hún sé Ómar Ingi [Magnússon, einn af lykilmönnum íslenska karlalandsliðsins]. Hún er að draga í sig menn, gefa á línu og komast á milli eitt og tvö aftur og aftur. Hún er aldrei látin prófa að skjóta utan af velli. Vinstri bakkinn hjá okkur í vörninni í dag var alveg rosalega lekur.“ Hafði Ragnar að segja strax að leik loknum.

„Markvarslan var góð. Þetta var það besta sem ég hef fengið í markvörslunni í vetur og hún var mjög jöfn og góð allan leikinn. Og svo er bara þetta, það virðist vera, ég veit eiginlega ekki hvernig maður á að orða þetta. Við héldum fund í haust þar sem við töluðum um það að fólk þyrfti að stíga fram fyrir ákveðna línu, standa með sjálfum sér og þegar Hafdís [Renötudóttr] mætir þá fara allir bara aftast í röðina, það er bara svoleiðis.“

Eins og fram hefur komið var Hafdís Renötudóttir alveg frábær í marki Fram í dag. Hún varði 26 bolta í dag, þar af voru fimm vítaköst.