Sigur hjá HK en jafnt í markaleik Keflavíkur og Fylkis

Keflavik og Fylkir leika bæði í Bestu deildinni í sumar og voru bæði búin að ná í sigra hingað til í keppninni. Keflavík hafði unnið sigra á KA og Þrótti en Fylkir vann stórsigur á Þór frá Akureyri í síðustu umferð.

Það var nóg af mörkum í Keflavík í dag. Fylkir komst yfir strax á 7.mínútu þegar Nikulás Val Gunnarsson skoraði en Sindri Þór Guðmundsson jafnaði fyrir Keflavík rétt fyrir hálfleik og staðan 1-1.

Bæði lið bættu við mörkum í síðari hálfleiknum. Nýr leikmaður Keflavíkur, Sami Kamel, skoraði úr víti á 55.mínútu en Birkir Eyþórsson jafnaði sjö mínútum fyrir leikslok og tryggði Fylki 2-2 jafntefli 

Í Kórnum mættust lið HK og ÍA. HK eru nýliðar í Bestu deildinni en Skagamenn féllu niður í Lengjudeildina á síðasta tímabili.

Það var aðeins eitt mark skorað í leiknum í Kórnum. Það gerði Oliver Haurits fyrir HK á lokamínútunni.