Víða élja­gangur og hvasst suð­vestan­til

Í hugleiðingum veðurfræðings segir að það verði éljagangur sunnan- og vestantil og að frost verði yfirleitt á bilinu eitt til átta stig.

Í kvöld má reikna með vestan og norðvestan tíu til átján metra á sekúndu og þá fer að snjóa norðanlands.

„Það lægir heldur á morgun og élin koðna niður. Á föstudag er útlit fyrir nokkuð hvassa suðlæga átt. Slydda eða rigning, en snjókoma fram eftir degi á Norður- og Austurlandi. Hlýnandi veður,“ segir á vef Veðurstofunnar.

Veðurhorfur á landinu næstu daga

Á fimmtudag: Vestan 8-15 m/s og minnkandi él á norðanverðu landinu. Hægari suðvestanátt síðdegis og stöku él vestanlands, en léttskýjað austantil. Frost 2 til 12 stig.

Á föstudag: Allhvöss eða hvöss suðlæg átt. Slydda eða rigning, en snjókoma fram eftir degi á Norður- og Austurlandi. Hlýnandi, hiti 2 til 6 stig síðdegis. Skúrir eða slydduél um kvöldið, en þurrt norðaustantil.

Á laugardag: Hvöss sunnanátt og talsverð rigning, en úrkomuminna norðaustanlands. Hiti 5 til 10 stig. Vestlægari með éljum og kólnandi veðri um kvöldið.

Á sunnudag: Suðlæg átt og styttir upp, en slydda eða rigning sunnantil um kvöldið. Hiti kringum frostmark.

Á mánudag: Sunnanátt með rigningu og hlýindum.

Á þriðjudag: Suðvestanátt og skúrir eða él sunnan- og vestanlands.