Samstarfsverkefni fataframleiðandanna er hluti af FW23 sýningu Ganni á tískuvikunni og fékk mikla athygli í Kaupmannahöfn í gærkvöldi. Fyrri samstarfslínur fyrirtækjanna hafa notið mikillar velgengni og það var því mikil eftirvænting eftir nýjustu línunni sem byggir áfram á borgarstíl Ganni og arfleifð og þekkingu 66°Norður á útivistarfatnaði.

Línan er framleidd úr endurunnum efnum og var hönnuð fyrir fjölhæfa notkun í borginni og úti í náttúrunni þar sem allra veðra er von. Talsvert af fatnaðinum er framleitt úr Gore-tex efni sem er vatns- og vindhelt en andar vel. Íslenskt landslag er áberandi í áferð og litum á ýmsum fatnaði í nýju línunni. Kríu jakkinn, sem var mjög vinsæll á tíunda áratugnum, snýr aftur með stæl í svörtum lit með gulum litatónum í. Þá eru jakkar, buxur, frakkar, pils o.fl. úr endurunnum efnum áberandi í nýju línunni. Bæði fyrirtækin eru með B Corp vottun og leggja mikið upp úr sjálfbærni í allri framleiðslu og efnisvali.

„Fyrsta samstarfslína okkar með Ganni var sýnd árið 2018 og nú með FW23 erum við að kynna okkar fjórðu samstarfslínu. Ferðalagið með Ganni hefur verið skemmtilegt, skapandi og hefur opnað á eitthvað nýtt í hvert skipti. Að hanna skemmtilega og skapandi hluti og læra eitthvað nýtt er að mínu áliti lykillinn að góðu samstarfi. Það er afar hvetjandi að sjá bæði merkin koma með sitt einstaka DNA að borðinu. Ég er mjög ánægð og spennt yfir útkomunni,“ segir Bjarney Harðardóttir, meðeigandi og stjórnandi 66°Norður.

„Ég trúi varla að þetta sé fjórða samstarfslína okkar með 66°Norður. Við erum mjög samstillt og vinnum vel saman bæði sem fyrirtæki og fólkið sem starfar þar. Bæði merkin eru stolt af arfleifð sinni og í þessari nýjustu samstarfslínu vildi ég fara aftur í rætur okkar og vinna með táknrænan fatnað sem gerir okkur að því sem við erum,“ segir Ditt Rafstrupp, hönnunarstjóri Ganni.