Febrúarspá Siggu Kling - Sporðdrekinn

Fyrir bjartsýnu Sporðdrekana mína er ekkert ómögulegt, því að febrúar, eins stuttur og hann er, er svo mikilvægur fyrir þig. Svo ef þú ert búinn að ganga með einhvern draum í maganum, þá gerðu eitthvað smá í því að það gerist. Hringdu í einhvern og opnaðu þetta upphaf og segðu: ég er tilbúinn.

Það eru ýmsir í Sporðdrekanum sem festast í viðjum vanans og vaninn verður að innræti, semsagt verður að þínum karakter. Þú átt ekki að stóla á neinn og að bíða eftir því að einhver rétti þér hjálparhönd. Þú hefur orku og kraft til þess að brjótast fram, sérstaklega núna þann fimmta febrúar þegar er fullt tungl í Ljónsmerkinu. Sporðdrekinn og Ljónið eiga sérstaka tengingu og þess vegna er þetta þín blessun líka.

Þú verður svolítið hneykslaður á fólki sem er í kringum þig eða þú þekkir vel. Það er samt best fyrir þig að hafa ekki endilega sterka skoðun á því og að segja ekki öllum hvað þér finnst um málið, heldur sýna umburðarlyndi og jafnaðargeð.

Fyrstu tíu dagarnir í febrúar eru tengdir við ástina, þá er sérstakur tími til að endurlífga og betrumbæta samband þitt. Og líka fyrir ykkur sem eru á lausu að bjóða hjartanu inn í líf ykkar. Og þó að þið hafið orðið fyrir vonbrigðum og það hafi verið farið illa með ykkur í þannig tengingu, þá skulið þig taka áhættu, því þið hafið svo mikið að gefa.

Að vera lengi einn getur líka orðið að vana og sett mann í búr sem erfitt er að brjótast út úr. Og þó að þú kvíðir mörgu og hafir áhyggjur af heiminum, jafnvel öllum, þá skaltu skera þær tilfinningar burtu úr huganum þínum. Því að þú ert þinn Alheimur og guð býr í þér, þess vegna er líka máltækið: Guð hjálpar þeim sem hjálpar sér sjálfur, svo stólaðu á ÞIG:

Knús og kossar, Sigga Kling