Ekki taka ábyrgð á annarra fjármálum, ég er bara að segja svona til dæmis. Þú hefur verið dálítið leitandi og skilaboðin eru leitið og þér munið finna, og það er sigur við endann á veginum.

Það verða töluverð ferðalög, jafnvel í sólina eða til einhvers staðar sem þú hefur ekki séð lengi og þú finnur að í þessu færðu friðinn. Þú þarft ekki að vera í endalausri keppni við sjálfa þig, því að þetta reddast er ævisaga þín og það er að hreinsast af þér gamalt og úrelt álag.

Líkaminn þinn er að taka við sér, þú ert að grennast, ef það er það sem líkama þinn vantar, án þess að þú hafir neitt sérstaklega fyrir því. Þú munt sleppa tökunum á manneskju sem hefur verið að gera þér lífið leitt og það besta sem þú gerir er bara að hætta að hugsa um hana.

Þú býrð yfir þeim hæfileikum að þora, þú ert sú manneskja sem getur tekið mikla ábyrgð, og með réttu fólki sem er í takt við þig geturðu tekið stóra áhættu. Og þó að þú hafir brennt þig einhverntímann og þurft að þola sársauka þá ertu þannig að í raun mun ekkert draga úr þér kjarkinn.

Þú hefur svo sannarlega hæfileika til þess að vera stjórnandi og þú munt ná þínu í gegn hratt og örugglega. Það er erfitt að stjórna þér og að skipa þér fyrir, því þá verðurðu öfugsnúin á endanum. Og þú ert að berjast svo mikið fyrir réttlæti, því þú þolir ekki mismunun.

Það eru miklar hamfarir að gerast í heiminum á þessu tímabili og ekkert virðist virka eins og það á að gera. Ekki vera hrædd um neinn skapaðan hlut, því það er svo margt að snúast sem stækkar hjartað þitt og leyfir þér að elska. Þessar sterku tilfinningar geta líka hatað, en þá þarftu að klippa á þann streng við þá persónu sem eitrar í kringum þig.

Þótt að þú hafir fæðst undir heillastjörnu, þá er samt stjórnin í þínum eigin höndum og þú skalt alltaf framkvæma fremur en að fresta.

Knús og kossar, Sigga Kling