Þú finnur fyrir því eins og þú sért á siglingu og það sé að koma stór klettur fyrir framan þig. En þú gerir allt hárrétt og þitt tungl, tungl Ljónsins er þann fimmta febrúar og þá byrjar nefnilega skemmtisiglingin. Þú finnur út leiðir sem hjálpa þér, þú forðast fólk og drama og þú skalt ekki sýna þeirri ókind neinn áhuga.

Skipulagðu og skrifaðu niður helst með einhverjum lit hvað það er sem þú óskar þér og vertu tilbúinn að taka á móti gjöfunum. Hrósaðu öllum í kringum þig, en þó sérstaklega þeim sem fara í taugarnar á þér, það mun margborga sig.

Þú átt eftir að færa þig úr stað, margir í þessu merki finna nýtt sér heimili og þetta verður auðveldara fyrir þig en þú heldur, því að þú ert ekki tré. Ef þú finnur ekki að þú sért að fara á þetta góða tímabil í byrjun febrúar, þá ertu að gera eitthvað vitlaust. Það þarf oft að sleppa einhverju í lífi sínu til þess að það sé pláss fyrir nýtt.

Orkan þín er svo opin og þú ert svo mikill andi að þú getur sogað að þér neikvæða orku og lent í aðstæðum þar sem þú verður misskilinn. Þú setur yfir þig sérstaka vernd með því að trúa því að þú sért verndaður. Þegar ég er með stór verkefni set ég þessa vernd huglægt yfir mig. Þegar ég er í bílnum mínum þá blessa ég hann og set yfir hann vernd með orðum og hugsunum. Og ef einhver er töframaður þá ert það þú.

Ef þú ert á lausu þá þarft þú að vera í jafnvægi ef þú ætlar að bjóða ástinni inn, því annars velurðu einhvern sem veldur þér vonbrigðum og hefur ekkert að gefa nema ójafnvægi. Það eru margir sem vilja heilla þig en þú átt að velja bestu sortina, það er það sem þú átt skilið.

Knús og kossar, Sigga Kling